Mindat Ah Kum Tling Lo Siangngakchia Pahnih CDF-Mindat Nih An Tlaih Hna- Chinram thlanglei, Mindat khuapi, Sanpya Bawathit sang ah a um mi tang 8 cawng lio kum tling lo nu pahnih cu CDF-Mindat nih an tlaih hna i nihin tiang an thlah rih hna lo, tiah theih a si. A luancia August 30 ni ah Mindat khuapi chung siangsangrun sianginn ah a kai mi siangngakchia nu pahnih cu chuncaw hlam in inn i an um lio ah CDF-Mindat Battalion 3 nih hramhram in an tlaih hna, tiah thil sining a theitu Mindat khuapi um tualchung mi pakhat nih a chim.
“Hi kong ah in CDF-Mindat Battalion 3 nih chungkhar lei phone an chawnh hna i anmah sin ah himdam tein an um kong an chimh hna, nulepa zong lungrethei tuk in um lo ding in an chimh fawn hna. An tlaih mi hna hi a fiang ko. Amah belte nihin tiang an thlah rih hna lo,” tiah Mindat khuapi um tualchung mi pakhat nih cun a chim.
Tlaih a tong mi siangngakchia nu pahnih cu:- Cherry Maung le Thang Ti Awi an si i an pahnih in kum 15 hrawng an si. Mindat khuapi ah tualchung hriamtlai phu CDF-Mindat nih kum tling lo mino ralkap tlakter ding in an rawt hna caah cacawng lio siangngakchia le nulepa lungrethei ngaiin an um hna, tiah Mindat khuapi um tualchung mi nih an chim.
Mindat khuapi lawng ah si lo in a peng chung khuate cheukhat zong ah ralkap tlakter ding ah hramhram in mino an tlaih hna i zan ah innchung ah luhnawh in tlaih a tong mi zong an um, tiah theih a si. Cu bantuk ṭhiamṭhiam in Kanpetlet peng, Circle-5 hmunram chung khuate zong ah CDF-Kanpetlet nih hramhram in mino an tlaih hna i AA ralkap training sianginn ah an kuat hna kong, Kanpetlet peng Circle-5 hmunram um mipi nih September 1 ah cathanh an chuah. Hi kong he pehtlai in Chin Defence Force – Mindat le Chin Defence Force – Kanpetlet nih cathanh an chuah mi a um rih lo. TCP