Hakha–Thantlang Kar Kahdohnak A Fak, Hliampu Mi SAC Ralkap 50 Hrawng Hakha Siizung An Phan- Chinram, Hakha–Thantlang kar Auto tlang SAC ralkap sakhan ah kaphnih kar kahdohnak a fak i ni 4 chung ah SAC ralkap thi le hliampu an tam caah hliampu SAC ralkap 50 hrawng Hakha siizung an phanh kong, CNF/CNA chimnak nawlngei Salai Htet Ni nih a chim.
“Kahdoh bawm ding in motor pahnih in an ra i ke in a kal mi zong an um. Asinain lam tanṭim ah kan kah hna i hliampu mi an tam ngai. Nihin tiang ah hin Hakha siizung ah a um mi SAC ralkap hliampu 50 hrawng an si tiin kan theih i siizung ah minung pahnih an thi cang,” tiah Salai Htet Ni a chim.
Hakha–Thantlang kar kahdohnak ah hin SAC ralkap pawl cu Hakha khuapi in hriamngan in kahdoh an bawmh hna pin ah vanlawng zong in an bawmh hna. Nizan July 24, zanlei suimilam 3:30 hrawng zong ah khan kaphnih kar kahdohnak a chuahnak hmun ah SAC ralkap nih raltuknak vanlawng in bomb an thlak nain Chinland Council ralkap chung in nunnak liam le hliamtuar mi an um lo kong, CNF/CNA chimnak nawlngeitu nih cun a chim.
Hakha–Thantlang kar kahdohnak ah hin Chinland Council ralkap CNF/CNA, CDF-Thantlang, CDF-Hakha, CDF-Lautu, CDF-Zophei, CDF – Senthang, CDF-KKG, People Defence Army – PDA, CDF-Vakok le CDF-Hualngoram tiin Chin hriamtlai phu 10 an ṭangṭi, tiah theih a si.