India Central Cozah Nih Ramri Phihkham An Timh Mi Kong Ah CYLA Nih Hnatlakpi- India Central cozah, Ministry of External Affairs, Joint Secretary B Shyam le Central Young Lai Association (CYLA) cu nizan September 13 ah tonbiaruahnak an ngei i India cozahpi nih ramri phihkham an timh mi kong ah CYLA zong an hnatla, tiah theih a si.
India ram Ministry of External Affairs, Joint Secretary B Shyam le Central Young Lai Association (CYLA) hruaitu pawl cu nizan ah Aizawl khuapi, State Guest House ah tonbiaruahnak an ngei i Kaladan Multi Modal Transit Transport Project le Zorinpui (Zochachhuah) ramri chawleh chawhrawlnak kong an i ceihmai, tiah theih a si.
Aizawl khuapi, State Guest House ah tuah mi tonbiaruahnak ah cun CYLA hruaitu pawl nih, India Act East Policy cu ṭha an ti i an dirkamh kong le ramri phihkham ding in timhlamhnak ngeih a si mi cu biapi ah chia in an hna a tlak kong, B Shyam an chimh, tiah Lawngtlai ah hrambunh minthawngzamhtu pakhat The Lawngtlai Post nih a langhter.
Atu lio i ramri chawleh chawhrawlnak kong ah India cozahpi nih biatak deuh in i hmaithlak seh ti an duh kong, ramdang mi zohfelnak Gate (Immigration Check Post) chiah ding le ramri chawlehnak (Border Commercial Haat) chiah ding in timhlamhnak an ngeih mi cu a rannak in tuah colh an duh kong CYLA hruaitu nih Joint Secretary sin ah an chim, tiah theih a si.
Cu pin ah Kaladan Multi Modal Transit Transport Project, Lawngtlai le Zorinpui kar motor lam a rawk mi kong le cuka hmunram ngeitu nih rawhralnak a ton mi ah rulhnak an hmuh rih lo mi ah ṭuanvo laakpiak ding kong zong CYLA hruaitu nih cun an chim chih. B Shyam zong nih, CYLA chim mi cu a biapi ngai mi a si tiah a chim i, cu an chuahpi mi pawl cu tlamtling ding in kalpi an timh kong le atu i an i timh mi Project a tlamtlin nakhnga CYLA cu a biapi tuk mi an si kong a chim ve, tiah theih a si.