SAC Nih Mindat Peng Ah Vanlei Kahdohnak A Tuah Peng Rih Caah A Bu In Um Lo Ding Tiah CDF-Mindat Nih Thawng A Thanh — Chin ramkulh thlanglei, Mindat peng ah SAC nih vanlei kahdohnak a tuah peng rih caah mipi hna nih a bu in um lo ding le mah inn tang siloin hmundang ah bomkhor ṭha tein cawh ding tiah CDF-Mindat nih nihin (August 19) ah ralrinnak cathanh an chuah. Cun Mindat peng mipi hna nih ṭihnung ral in himnak hnga khuabawi le ṭuanvo ngetu pawl sin ah biahal ding le lungre a theih ter kho mi thawngpang dik lo pawl thlah lo ding tiah an thanh chih.
Mindat peng chung April le May thla 2 chung ah SAC nih vanlei in 500lb a rit mi bom, a kang mi bom telh in a puah fak mi bom pawl hmang in voi 36 vanlei kahdohnak a tuah i Chin ramkulh chung ah vanlei kahdoh a tam biknak peng a si tiah theih a si. 2024 thla 6 chung ah SAC nih Mindat peng ah vanlei kahdohnak voi 86 a tuah i mipi mipi 8, hriamtlai 3 an nunnak a liam, mipi 50 leng le hriamtlai 2 an i hliam tiah CDF-Mindat nih August 9 ah cathanh an rak chuah.