Chinram Kai Ding Motor 70 Leng Cu YDF Nih Gangaw Peng Ah An Kham Hna- Magway ramṭhen, Gangaw pengkomh chung ah hriamtlai phu khat a si mi Yaw Defense Force (YDF) ralkap pahnih cu CNA ralkap nih an rak tlaih hna i an thlah rih hna lo caah YDF nih Chinram lei ah kai aa tim mi motor 70 leng cu Gangaw peng ah an kham dih hna, tiah theih a si.
YDF ralkap pahnih cu Gangaw peng le Chinram, Matupi ramri Zawngnak khua ah CNF/A nih a luancia July 7 ni ah an rak tlaih hna i a thaizing July 8 ni thawk in Chinram lei ah kai aa tim mi motor vialte cu YDF ralkap nih lampi ah an kham hna i an dirter dih hna, tiah theih a si. YDF in ṭuanvo ngei pakhat nih cun, “YDF ralkap pahnih tlaih an si ruang ah humhimnak caah lam kan phih chungnak a si. A si khawh chung in hon zau kan i zuam lai, eidin tirawl kong ah a tlamtlin khawh nakhnga kan ralkap pawl i zuam ding in kan chimh ko hna,” tiah Yaw Alintan ah a chim.
“CNF/CNA nih tlaih mi YDF ralkap pahnih cu nihin July 11 ah hin thlah ṭhan ding in CNF/CNA ṭuanvo ngei nih an chim nain atu tiang an thlah rih hna lo,” tiah a chim chap. YDF pahnih tlaihkhih kong ah hin CNF/A chimnak nawlngei Salai Htet Ni nih cun, “YDF ralkap pahnih an tlaih mi hna hi cu chikkhat ca i biaruahnak ngeihpi ding ah an tlaih mi hna a si ko. YDF he kan kar ah zeibantuk huatnak hmanh a um lo i upate he biaruahnak an ngeih hnu ah a tlamtling dih ko lai,” tiah July 9 ni ah khan Chin World Media ah a rak chim.