USA ramah Chin Ca zir theinak thu Perry Township School District, Indianapolis, USA ah Chin ca/tong zir theinak thu thawn pehpar in thu hla mipi theihttha thu tawi:
USA ram ahcun school pawl hi govt. in direct in an uk lo, School Board ih ukmi (govern) mi asi. School board in federal & State guideline, laws vekin mah le school district cio ah thuneih, lairel, policy tuah, uk asi. School board cu mipi in election in hriltlinmi an si vekin USA School pawl cu mipi thuhnuai ah a ummi, mipi tamsawn duhdan in fale students thansohnak hrang zirnak school system a si. Mipi in thuneihnak sangbik nan nei ringring.
Perry Township School Districts ah school 24, zirnak training center thawn, a um. Students 16,000 tluk an um. Asian (Chin) student 30%, mirang 48%, culole cu midum 10%, Spanish 17%, le miphun Dangdang tla an si. Perry School District ah ram 60 lenglo ihsin a ram mi, tong 60+ hmangtu tlawngta pawl umkhawmnak asi. Tlawng Uktu, school board member 7 an um, Chin mi pakhat, Afrifan American 1, culole miring 5 an si.
School board in School policy a tuah, budget approve, hnatuantu pawl hnatuantdan thlakhat voi 2 zoh ringring, nemhnget, thleng, rem, bet tulmi zoh ringring, thuthluknak tuah asi.
School board in district sung ih tlawng hnatuan sangbik kaitu Superintendent (SP) hnatuantu a lak (hire), a tul asile a banter (fire) ih SP in school principals, le hnatuantu pawl a kaihruai, school administration a kaihruai. Cutin SP le a ho pawl, Admin department in school hnatuan dan, employee thu siseh budget thu siseh cariculum thu, student thu pawl school board ah thu a suah, report a pek ringring ih school board in lungkimpi, ngemhnget, thleng, rem, in school hnatuan tu pawl in hna an tuan.
A tu Perry Township School District ah SP cu keimah School board ka tuan thawk ah kan lak mi (hire) mi asi. School board 7 kan um ih SP thawn thlakhat voikhat one on one meeting, kan tawng aw theu, board meeting regular thlakhat voi 2 kan nei ringring. Cutin tlawng thansohnak, student thu, government thawn pehtlaihnak, community thawnn pehtlaihnak, le curriculum, tvp, ziangkim ruat tlang, reltlang, thuthluknak tuah tlang mi asi. SP kan lak thawk ihsin Perry School ah Chin ca zir ding ka sim, kan rel, lungkim tlangnak kan nei.
Chin Community of Indiana (CCI) hi Chin mi ramleng umnak umkhawmmi pawl zohthimtlak in Chin mi zapi huap pawlkom asi. School SP in CCI hruaitu pawl le pastor pawl thla 3 voikhat a kom, Chin Community leaders le pastors pawl, mipi lak ihsin interest tu le School SP meeting tuah ringrign asi. Cumi ah a duhduh in school SP hnenah an sim cio. CCI in Chin ca zir theinak dingin SP hnenah an dil tiah an sim.
School staff, tlawng hnatuantu 2,300+ school zate ah kan nei, cumin lakah Asian mi tlawng ah hnatuan cu 3% lawng an si. Kan dung naite ah Perry School ah hnatuantu pawl Chin mi staff dinner eipinak, fellowship pawlkomnak kan nei. Hmailam ahtla neih vivo kan tum. Perry School District ah Chin mi tampi hantuantu kan tul. Human resources director ka relpi, hnatuantu, teachers tampi kan tul, bus driver ihsin kichen hnatuantu tampi kan tul.
Perry School system sungah Chin mi hnatuan hmaisa bik le tu tiang kum 16 lenglo tuantu, Chin mi bawmtu cu Pu Van Ceu Uk a si. A nih hi Community, parents liaison officer asi. Chin mipi, community, le students le school hnatuantu, SP ihsin thawk in pehtlaihnak tha ngaingai kan nei. High School graduation ah voi 2 diplama petu, School board member dinhmun in ka tel. 2024 high school graduate tla Student leaders, ceremony opening speech, petu tvek, Chin student pawl an si. Pathian in Chin student pawl thlasuah in pek zet, top 10% students ah tam zet an tel ringring. Sports ah a bik takin soccer tla cu Chin students paw in hmai an hruai thei nasa.
USA Public school mi tampi in an rinsan lo.
Culai ah Perry School District tlawng pawl ah nulepa ih zumnak biaknak thawn kalh in zianghman tlawng ah zirh lo ding, tuah lo dingin school board lam ihsin tan kan la, SP le admin pawl thawn kan rel tlang theu, lungkimtlangnak kan nei. Nulepa in siseh mipi lam ihsin nulepa zumnak thawn a kalh mi school ah pakhatkhat a um asile in theihter hram uh.Chin ca school ah zir thei hi a thupi zet. Curriculum pakhat in zir tikah students pawl in tong/ca thiamnak men si loin high school graduate nak hrangah foreign language pakhat in an zir ih mark/credit an ngah mi cu a tha ngaingai.
Ziang tong kan zirh ding? Burma, Chin, Chin ca timi ah tong tampi a um tikah ziangtin kan tuah ding? Perry School District ah leitlun ramtin ihsin a ra mi tong 68 a ummi zapi ten school ah zirh a ngah lo. A hmaisa bik ah tong cikhat in thok phawt ding ih hmailam ah ziang kan bang kan zoh vivo ding, tiah thutluknak tuah asi. Asile zo in ziangtong zir ding timi thutluknak a tuah ding? School staff pawlin an tuah mi si loin, Chin Community of Indiana, board of management pawlin an rel khawm ih student ih hman tambik mi Chin (Hakha) tong/ca zir ding timi thuthluknak an tuah mi asi.Chin Community of Indiana (CCI) cu Chin churches 60+ pawl in sport mi asi. Hril awk tikah Chin churches pawlin palai an thlah ih cutin Board of Management (BM) an hril mi asi. CCI ah tufang tuanvo neitu lakah Falam lam ihsin Pu Van Tuah Piang a tel, vice president asi.
Chin ca/tong ti ve ten Chin State ah common language ziang asi, tivek thu thawn pehtlaihnak a nei lo timi kan theih cio vekin school districts sungah a umtu mi pum tam, students a tam bik mi, tong hman tambikbik ziangmi a um, ti mi school staff khal in an zoh, Chin Community leaders pawl in an zoh ih thuthluknak an tuah mi asi. Hmailam ah Burmese, le Chin tong/ca dang dang tla zir bet vivo theih asi pei maw? Timi thu ah students ziangzat an um timi parah a thum aw zet, thei lo nak a um lo.A dawt dawt ten thu fehpi dan:
#1. Policy makers: School board ih lungkimnak vekin foreign language ziangziang school ah zir a theih timi a um. (Chin ca zir thu ah school board in vote a um lo; policy neih cia mi vekin SP kaihruainak in tuah mi asi).
#2. Superintend hnenah a tulnak sim theitu um a tul. Community leaders, school staff, school board, zozo an si khal le students ih tulmi nulepa ih duhmi sim theih a tul. Simtheitu an um ih Chin ca zir theinak asi. Culole, School staff pawlin students ih tulmi zoh in tong thar zir bet theih asi.
#3. SP in staff pawl thawn thu rawn aw in zirh theih dinhmun an si maw, facility le resources a um maw timi an fiah hnu ah SP decision vekoin zirh ding thuthluknak tuah asi.
#4. Tong neitu ram pakhat sungah tong tampi dialects tampi a um tikah ziang bik zirh a tha ding timi cu SP in a ram ih minung tong neitu pawl hruaitu pawl thu rawn in community leaders, ethnic leaders pawl ih lungkim tlangmi vekin tuah asi.
#5. Ziangtin zirh asi ding? School staff, teachers lak ihsin asingment tuah in tuanvo latu bik in ziangmi ziangtin zirh asi ding timi cu tuanvo pekmi in an tuansuak vivo ding.
Tul zetmi: Chin ca calai, lessons pawl calai hmanrua tha zet neih a tul. Kan umnak hmun kip ah Chin ca, Chin tong a tam thei bik in zir hman vivo thei kan zuam pei. Chin mi lakah tong/dialects tampi a um tikah zokhal khui tawk khalah a ram le dinhmun, a minung umtu, students/parents ih zir in tuanvo neitu in an tawlrelmi ah Ziang tong/ca khal Chin fahniang pawl in zir theinak an neihmi parah lungawi cio uhsi.
Curuangah ramdang thleng pawl, khua pakhat, school district pakhat ah a hlawm in Chin mi kan umkhawm a tul, a thupi tuk. University level, high school level tiangin credit an ngah theinak dingah siseh zir tlak, zirh tlakmi tong/calai asi theinak ding hrangah hmanrua tampi kan tul, pumpe in tuanvo latu, timtuah tul kan tul. Cu rualrual in community hnatuannak ah cozah lam, school lam, policy makers, staff, hnatuantu pawl thawn tampi pawlkomnak, pehtlaihnak, le hnatuan tlangnak kan neih a tul ngaingai. “Thawngtla in ka lo fehternak khawpi ih ṭhatnak hrangah hnaṭuan uh. Ka hnenah an hrangah thlacam sak uh. Ziangahtile an ṭhangso ih mi neinung an si ahcun nannih khal mi neinung nan si ve ding.” (Jeremiah 29:7)
God is good
Rev. Hre Mang, Ph.D.
School Board Member,
Perry TownShip School District,
First Elected Chin American in the USA