KNDF le KA nih Shadaw Khua an Laak, SAC Ralkap 90 Hrawng an Thi, 30 an Nung in an Tlaih Hna- Karenni ramkulh, Shadaw (ရှားတောမြို့) khua cu Karenni hriamtlai bu KNDF le Karenni Army (KA) nih an laak khawh cang, tiah theih a si. Shadaw khua ah a um mi SAC ralkap sakhaan cu January 15 thawk in KNDF le KA nih an tuk i, nizaan February 12 ah an laak, tiah People’s Spring nih a ṭial.
![](http://teachexclusive.com/wp-content/uploads/2024/02/t.jpg)
Sadaw khua ah hmun a khuar mi SAC ralkap hi naite ah ralzaam naupawi pakhat le ngakchia pathum telh in minung pasarih a thattu kha an si, tiah an langhter. Shadaw SAC ralkap sakhaan laak kahdohnak ah SAC ralkap lei in minung 90 hrawng an thi i, a dang ralkap 30 zong an nung in an tlaih hna, tiah theih a si. THP
Kawlin Khua Hmunhma A Cheu Leng Ralkap Nih An Tlaih Ṭhan- — Dothlennak phu pawl nih an rak lak mi Sagaing ramṭhen, Kawlin khua cu SAC ralkap pawl nih khuachung tiang lut in hmunhma tam deuh cu an tlaih ṭhan tiah The 74 Media nih a langter.
SAC ralkap nih a luancia February 3 thawk in thazang tampi hmang in kahdohnak a tuah i ni 10 a rauh hnu ahcun khuachung tiang an luh khawh hi a si tiah dothlennak chungtel pakhat nih The 74 Media ah a chim.”Kawlin thawngpang cu ngaihchia ngai a si. A luancia ni 3 ah ralkap pawl khuachung an lut kho cang. A biapitnak pawl ah hmunhma an khuar” tiah a chim.
Khua luh ka ah a umi mawṭaw dinhnak tual, GAD zung, palek sakhaan le Myanmar sipuazi bank hna ah ralkap pawl nih hmunhma an khuar ṭhan cang tiah adang hriamtlai 1 nih a chim ve. Khuami hna cu himnak hmun ah an zaam hna i Wuntho peng in Kawlin ah a lut mi ralkap pawl nih Nga-puai-gyi, Nga-puai-lay khua mipi inn pawl an khangh tiah an chim. TCLP