Tabayin Khuapi Cu SAC Ralkap Nih An Uk Ṭhan Cang. Sagaing ramṭhen, Tabayin khuapi cu SAC ralkap nih vanlawng in an kah i ralkap thazaang chap in an kah ṭhan caah nizan August 18 zanlei ah an laak ṭhan kong, Tabayin hrambunh tualchung hriamtlai phu nih an chim. Tabayin khuapi cu PDF ṭangṭi phu nih August 18 zinglei ah an laak nain SAC ralkap nih vanlawng in atu le atu kahdohnak an tuah caah khuapi kan chuahtaknak a si, tiah Tabayin hrambunh tualchung hriamtlai phu hruaitu Bo Gyar Gyi nih a chim.
“Nizan August 18 zanlei in SAC ralkap cu Tabyin khuapi ah umhmun an khuar ṭhan. Vanlawng in an kan kah tuk caah hliam lai phan ah hnu kan tolh. Vanlawng in dongcat lo bak in an kan kah. Jet Fighter pahnih in voi hnih an ra i Monywa Nah-Mah-Khah in Mi35 he kahdoh bawm ding in ralkap an chap fawn hna,” tiah Bo Gyar Gyi nih cun a chim.
Tabayin kahdohnak ah hriamnam chiah in aa ap mi Pyusawhti pahnih, SAC kuttang rianṭuan Non CDM 41 le an chungkhar 80 tiin an zate minung 123 cu khuapi in kan chuahpi hna i kan hren rih ko hna, tiah PDF pakhat nih a chim. Tabayin khuapi kahdohnak ruang ah Tabayin khuapi um mi le Tabayin–Ye-U lampi khua i a um mi tualchung mi 20,000 hrawng cu a himnak hmun kawl in ral an zaam hna, tiah tualchung mi nih an chim.