Siaha khuami Auto driver thattu minung 4 hna cu an dihlak in tlaih dih an si cang hna. Ahmaisa ah minung 3 an tlaih hna i, an lakah upa bik mithattu bik ah ruahmi Thethe cu a zamnak ah Siaha Meisatla ah an tlaih. Palek kut a phanh hlan ah mipi thinhun tuk i sum khawhlo ruangah faktuk in kut an thlak.
Atu hi Palek nih mipi kutchung in an lak i sizung ah chiah a si. Adirhmun a chia ngaingai tiah theih a si. Lainawng hna pali hi Arakhan mi si loin Burma Mara Raka ah a ummi an si. Mara hmunram khua ah a ummi an si ko nain, nihin ah Alliance Affairs, Information & Publicity Department Maraland Territorial Council nih cathanh an chuah ning ahcun, kanmah Mara miphun an si lo tiah an langhter.
![](http://teachexclusive.com/wp-content/uploads/2024/01/ds.jpg)
Chin Hriamtlai Phu Khat Le Phu Khat Kar Ah Hriamnam Hmang Lo In Cabuai Cung Biaruahnak Tu Ngei Ding In CCM Nih Forhfialnak Tuah. Chinram chung ah dohthlennak a tuah mi Chin hriamtlai phu khat le phu khat kar ah buainak a chuak tawn mi kong ah hriamnam si lo in cabuai cung ah biaruahnak he ceihmainak tu ngei deuh ding in Chin Civic Movement nih nizan January 25 ni ah forhfialnak an tuah.
January 24 ni ah a cang mi Mara hmunram chung Lailenpi khuapi Chin hriamtlai phu kaphnih kar kahdohnak ruang ah nunnak tiang a liam mi kong he pehtlai in a rannak in biaruahnak le ceihmainak he ngawlter ding le kaphnih ṭuanvo ngeitu hna cu Chin hriamtlai phu dangdang cio cu unau sinak lungput he tonbiaruahnak ngei ding in le ceihmainak ngei ding in Chin Civic Movement nih forhfialnak an tuah.
Lailenpi khuapi ah MDF nih CNA le CDF Mara cu an kah hna i, CNA in Sergeant pakhat le CDF-Mara ralkap pakhat an nunnak a liam. CDF-Mara Second Company Commander pakhat hliam zong a pu. Cu pin ah CDF-Mara Tactical Operation Command le Company Commander telh in ralkap 5 cu MDF nih an rak tlaih hna i, nihin tiang an thlah rih hna lo i pehtlaih khawh an si ti lo.
Chin Civic Movement nih dohthlennak a tuah mi Chin hriamtlai phu khat le phu khat kar kahdohnak le ramkhel he pehtlai in buainak a chuak tawn mi kong ah an lungre theihnak an langhter i, mizapi i telnak ruahnak fumtom mi cu Chin hriamtlai phu hna sin ah pek a si cangnak kong zong January 19 ni thawngpang ceihmainak ah an rak chim.
![](http://teachexclusive.com/wp-content/uploads/2024/01/Screenshot_19-1.png)