Sii-ai Chambauh Ruang Ah Matupi Ralzaam Pakhat A Nunnak Liam- Chinram, Matupi peng ah ral a zaam mi tualchung mi pakhat cu sii-ai chambauh ruang ah a nunnak liam, tiah theih a si. Matupi khuapi, Lawngvan sang ah a um mi Pu Pa Sang cu Leising khua ah ral an zaam hnu ah kal le pawpi lei dam lonak in a zaw i an ralzaamnak khua kiangkap ah an thlop ko nain sii-ai lei chambauh ruang le siibawite an um lo ruang ah nizan July 14, zan suimilam 7:00 ah a nunnak a liam, tiah theih a si.
“Matupi in a pule khua Leising khua ah ral an zaam i voi khat kahdohnak a chuah hnu ah a kiangkap khua ah i thlop ding in an zaampi ṭhan. Mizoram lei kal ding zong ah lam an phih, fur a si fawn tik ah motor zong a kal kho lo. A biapi cem mi sii-ai chamhbauh ruang ah thlopbul kho ti lo in a nunnak a liam,” tiah tualchung mi pakhat nih a chim.
Matupi khuapi kahdohnak a fah ruang ah tualchung mi cu khuapi chuahtak in ral an zaam dih hna i Matupi peng khuate le Mizoram chung ah ral an zaam hna, zingzan an eidin tirawl le an ngandamnak kong ah harnak phun tampi an tong. Nizan i a nunnak liam mi Pu Pa Sang nih a nupi le a fale 5 a kaltak hna, tiah theih a si.