Thantlang Peng Hmunthar Khua Ah Inn Pakhat A Kaang- Chinram, Thantlang peng, Khualhring tlang Hmunthar khua ah inn pakhat a kaang i a ciam dih, tiah theih a si. Nihin February 23, zanlei suimilam 6:00 hrawng ah Thantlang peng Hmunthar khua ah kangh-uhnak a chuak i innchung thilri chuah manh lo in Pu Hram Awr inn cu a ciam dih, tiah theih a si.Pu Hram Awr inn cu ram buai hnu ah an sak thar mi a si i zeitindah a kangh ning a si ti mi fehternak a um lo nain khua mi cheukhat nih an chim ning ah cun Electric mei in aa thawk an zumhnak kong The Chin Post ah an chim.
![](http://teachexclusive.com/wp-content/uploads/2024/02/5.jpg)
Kangh-uhnak a tong mi chungkhar he naihniam in a um mi pakhat nih cun, “Tuzanlei suimilam 6:00 hrawng ah ruah lo piin kangh hram aa thawk colh i mei a kangh ning a ran ngai caah innpa nih an chuah hnawh hna ah cun innchung ah luh ngam a si ti lo i innka hram ah an hun mi Fridge dah ti lo thil dang an chuah manh lo, inn tang ah an zuat mi vokte 10 zong a ciamh chih dih i lung a ṭha lo ngai, inn ngeitu belte cu an him ko,” tiah The Chin Post ah a chim.
“A ciam dih mi Pu Hram Awr inn cu ram buai hnu an sak mi a si i caan sau hmanh an um manh rih lo, hmun dang in ral an hung zaam hnu ah an sak mi inn a si caah a thar zong a thar ngai rih, zeitindah a kangh ning ti mi tu cu fehternak a um lo nain Electric mei in aa thawk lai tiah zumh cio a si ko, phalh manh lo in a ciamh dih ko cu khua mi kan lung a ṭha hrimhrim lo, kan tuarpi cio hna,” tiah kangh-uhnak a tong mi chungkhar he naihniam in a um mi pakhat nih cun a chim.