Tluang Lian comment--“Chin mi” ti hi nan duh taktak maw? BAWIPA sermi ram pakhat si nan duh taktak maw? Ram buai lio cherchanin, Chin unau sinin chuah i “Mara” tiin a dang tein um nan duh ko lo maw? Chin mi phun tete hna hi, USA, China, India le ram pakhat khat bantukin aa țhen tlak kan si lai maw?
BAWIPA thimmi si tah nan duh maw? BAWIPA nih Chin miphun hmangin zeidah aa tinh?
Nan mifim, nan i bochanmi hna; vawleicung level in cawnnak a ngeimi hna nih ruahnak an in cheuhmi hna hi, BAWIPA PATHIAN tinhmi he aa kalh sual maw?Chin miphun cu, BAWIPA nih amah caah a kan thim i AMAH caah tinhmi ngei tein ram pek le miphun Thluachuak ah ser a kan timh dah kaw!
Chin ram chung i “Mara” hi, Mizoram i “Mara” unau hna ram tluk i tim hlah u! Hinak ngan le tamin BAWIPA nih Thluachuah pek a kan duh hih! Cucaah, Chin ram chung i Chin miphun nan unau hna he pumkhat sinak tu kawl i zuam u.
Laiko Meipaw=CDF-Mara le MDF kong buainak tuanbia dik le an sining Mara Army timi hi 2021 hlan ah a rak dir cang i AA sin ah training an rak kai. Mara autonomy khi an saduhthah bik a rak si. 2021 hnu ah CDF-Mara timi hi NLD saya bawi kung te nih pawl an dirh hmasa i Thantlang peng Mara khua tlawmte 5-6 lawng khi an rak si. CDF-Thantlang tangah an rak um.
Cu hnuah Mara minobu MTP hruaitu hna, Mara sianghleirunbu MSA hruaitu hna, Mara CDM a tuahmi hna, phu 3 komh nih CDF-Mara timi cu Mara pumpi huap in a hnu ah an hun dirh ve.NLD saya bawi kung te phu CDF-Thantlang tang a ummi CDF-Mara cu a hnuah an chuak i CDF-Mara pumpi he cun an i fonh. Nain, an i fonhnak hi a fek lo; khuaseng aa tlaimi sawhsawh bantuk te hi asi.
NLD bawikung Thantlang peng CDF-Mara nih CDF-Mara pumpi Headquarters bia cu a rak doh lengmang. Statement an chuah in an kalh lengmang. Thantlang peng Mara hi thlanglei Mara he an rem kho tawn lo. Biaknak zong aa dang i an tam deuh an ngan deuh an fim deuh tikah an tei tuk hna caah an si a vang tawn. Cu lungput cu NLD saya bawi kung Thangtlang peng CDF-Mara nih an kalpi tikah CDF-Mara chungkhar cu buainak le harnak an rak tong lengmang.
Cucaah CDF-Mara cu NLD saya bawi kung te Thantlang peng CDF-Mara phu le Mara mino le Mara student hruaimi CDF-Mara tiin a chunglei ah phu 2 in hma a rak um peng cang. NLD Mara nih miphun hoih in a kalmi Mara mino le students pawl cu an rem hna lo.Voikhat cu CDF-Mara conference an tuah hna i, MPC/CDF Mara tiin an hun dir. MPC timi cu Mara People Concil timi zatlang uknak bu khi a si.
MPC/CDF-Mara min in CJDC ah member an si. Nain, cu confence ah NLD saya bawikung Thantlang peng CDF-Mara cu upa ah an tling kho ti hna lo i hruaitu upa ah a chuak lomi a dang he an i kom hna i fakpiin MPC timi cu an doh i CDF-Mara chungkhar cu a buai. Zatlang uknak MPC tuah a hau lo tiah an buai. Mara facebook group phun kip ah ca an thlah i, an buai tuk cang. Mara pumpi cu CDF-Mara chungkhar buainak nih MPC kongah fak tuk in a buai cang.Cu caah Mara Community USA hruainak in Global Mara Meeting kha an kawh i bochan mi Mara upa 30 leng kha sawm an si. NUG vunci Dr Sa Sa kha khual lian ah sawm asi. Mara Army palai zong kha meeting ah sawm an si.
Biachahnak an tuahmi cu MPC timi hi chikkhat ngolter chung sisehlaw Dr sa sa le India lei Mara cozah le mino MTP upa hna he i bawm in lungrualnak khanpi dingin bia an chah. Dr Sasa nih cun a hun khanpi hna. CNF in Pu Htet ni zong kha aa va sawm.
Dr sasa nih fak tuk in a hun palh. Amah lawng in zeipoah thil a tuah dih i upa dang a ceihpi ti hna lo. India lei Mara upa kha a cungah an lung a tling ti lo. CDF-Mara upa zong kha a cungah an lung a tling ti lo.
Dr sasa nih amah nawl in CDF-Mara hruaitu vialte cu a thim dih hna i, fehter dingin thlacam nak zoom program a kuat dih hna. NLD saya bawikung zong cu hruaitu min cazin ah a hun telh ve. Nain, CDF-Mara hruaitu tam deuh nih phunghram hna suai hnu ah election tuah ding asi mi dr sasa a thil tuah dan cu an cohlang piak kho ti lo. India lei Mara cozah le upa zong nih an pompi kho ti lo. cucaah Dr sasa le CNF htet ni khuakhannak cu a rawk dih. lungrualnak an ceih khanmi cu a rawk dih. Dr sasa le cnf Htetni cu lungfak in lo diam an zam tak hna. Mara mino le student mino CDF-Mara hruaitu pawl cu an huat hna. Saya bawikung zong cu hruaitu ah a can khawh ti lo tikah a lungfak ve.
Cu a rawh dih hnu ah Salai VLT cu CDF-Mara upa, India Mara cozah le USA Mara community upa nih cun kan bawm hram law tiah an va sawm. Salai VLT nih Dr sasa zong cu sawm than u law pengkip tlangkip phu kip aiawhtu commitee kan ser lai i phunghram tial kan thawk lai. cu a dih in conference kan auh lai i phunghram kan fehter lai i, upa thimnak kan tuah lai a ti hna.
USA, Australia, Europe, Malaysia, CDF-Mara, Mara Army, CDM a tuahmi, India Mara cozah le India Mara MTP le Mara tlang 5 in aiawhtu hruaitu upa vialte in committee upa 18 kha an dirh. Salai VLT nih meeting zulhphung kha a tial piak hna i meeting cu an tuah, a mah tu cu committee chungtel ah aa tel lo. Thantlang peng Mara aiawh in NLD saya bawi kung cu a hun thlah. Saiha an phak hlan India ramri ah Mara tlangkip aiawh in a ra mi upa hna cu a rak sizung dih cang hna. kan duhmi kan hmuh lo cun kan chuak lai ti in.
Committee upa 18 meeting cu an tuah i, zatlang uknak bu tuah le tuah lo mee an thlak tikah NLD saya bawikung te phu hi an sung. vote 7 le vote 10 in an sung vote 1 hi neutral in a um. CDF-Mara aiawh cu khuatlang uknak bu tuah lei in kut a thlir. cu tikah NLD saya bawikung te phu cu an lung fak cang. cu cang ka in lungfak in a rak zam tak mi hna dr sasa le cnf htet ni te he cun bia an ruah colh hna. committee 18 chungtel sinak in chuah sisehlaw CDF-Mara a thar dirh siseh tiah bia an chah i lodiam khua ah an tlung hna. Mara mino hruaitu, student hruaitu CDF-Mara pawl cu an zam tak hna.
NLD saya bawikung cu khua a tlung i NLD pu Za cung te pawl kha a va sawm hna i, CDF-Mara thar cu dirh an i zuam. Nain, CDF-Mara ral bawi vialte nih an cohlan lo caah an kham hna caah an dirh kho lo. Cuti cun awlokchong in an tang ko.
Comittee upa 18 ah a tangmi hna cu kan rian kan peh zulh lai maw an ti tikah CDF-Mara ralbawi vialte nih pehzulh si ko seh tiah an cohlan caah rian cu an peh zulh thluah mah. Phunghram ahran tialtu ah mi 5 an thim hna i, Dr Sa Sa zong an sawm nain a nuar cang.
Salai VLT nih an phunghram cu CDF-Mara mino he i bawm in a tial piak hna. an lim in Mara conference an auh i, khua 44 an kai i upa 300 an kai hna. India Mara cozah nih intek tuanvo a lak piak hna i hlunghlai tak in an tuah. NLD bawi kung le NLD zacung te pawl zong cu an sawm ve hna na in an kai duh ti lo. Thantlang peng mara khua 4 in an kai duh lo cu lo cu an kai dih.
Mara Army le CDF-Mara timi cu conference civui pi nih a fonh hna i, min an thut, MDF timi kha a hun chuak. Mara Army le CDF-Mara cu hrawh a hun si. Cun zatlang uknak bu min kha MATC tiah an sak. Mara mipi 95% nih lunglawm taktak in cohlan a si. India Mara zong nih mah cucu a dirpi ve. Cu conference ah a kai duh lomi cu Thantlang peng Mara khua tlawmte le Dr Sasa a nuarpimi mi tlawmte kha an si. Mara nld khua deuh kha an si.
Hi lio ah NLD saya bawi kung le NLD Mp Zacung te pawl cu awlokchung in an um cang. NLD Zacung nau Laiki te pawl nih fak tak tak in MTC/MDF cu online an thangchiat colh. Dr NCL bu a si, ral kap an do duh lo, India Mara he in dang chuah an i tim tiah a phun phun in an soisel. Thangtlang CDF in kan um than lai i CDF-Thantlang tangah kan lut than lai tiah an khan. Vanthat ah Dr Sasa a nuarpimi Lailenpi tlangval cheukhat he an vai tong hna. CDF-Mara an hrawh i, MDF an dirh cang timi statement a chuah in khan CDF-Mara kan dirh an ti i, Camp Victoria ah an va kal colh, CJDC member kha an i cuh. Mara mino hruaitu le Mara student hruatu nih hruaimi CDF-Mara pawl cungah a lungfak mi dr sasa le CNF Hetni te pawl nih cun CJDC ah cun an dirpi hna.
CJDC ahcun Mara mino le student mino CDF Mara (MTC/MDF ah aa thlengmi) nih an thlah liomi an palai pa cu a rian in an ngolter i, NLD bawikung NLD dr sasa le NLD laiki le NLD zacung te pawl nih an dirhmi a thar CDF-Mara khua tlawmte (khua 5) cu luhter an si. lungfak in a zammi CNF hetni nih cun a bawmh hna. Cucun CDF-Mara le MTC-MDF ti in a hun buai thawk nak cu a si.
Salai VLT nih cun mah Mara mino hruaitu Mara student hruaitu pawl MTC/MDF (CDF-Mara dirhtu pawl) hi CJDC ah luhter ko hna uh law Chinmi he CNA/CDF he zong rian an tuanti lai i a tha deuh, nan hlawnh hna ahcun Chinmi he an i hlat tuk sual lai i a pawi tuk te lai tiah ruahnak an rak pek hna nain CJDC chungtel in cun chuah an si ko. Cu hnu ah MTC/MDF hruaitu pawl cu AA sinah an kal thainak asi. Salai VLT nih AA sin um cu a duh piak ve hna lo i AA sinah hin kal zong an rak i tim ti lo nain CJDC chung in an chuah hna hnu in thuk chin in AA he an i pehtlaih nak a si.
Cuticun NLD Mara pawl hruaimi CDF-Mara a thar le miphun hoih in ramkhel a kalpimi Mara mino le student hruaitu CDF-Mara pumpi a rak dirhtu pawl hruaimi MTC/MDF tiah a hun kuai. Salai VLT zong nih Mara NLD pawl tuahmi CDF-Mara si loin tlangmi miphun hoih in a kalpimi Mara mino le student hruaitu pawl hruaimi MTC/MDF cu a dirpi ve hna.
MTC/MDF hruaitu cu Mara mino le cathiam an si caah khua an ruat kho i, Mara NLD upa pawl NLD bawi kung, NLD zacung, NLD Lai Ki te hruaimi CDF-Mara he cun i fonh than dingin kum 2 chung an i zuam lengmang. Nain, cjdc le chinland council ah co hlanmi kha sang tuk ah an ruat i nawl ngeihnak lawng a duhmi NLD naingnganzi tama le tlangmi miphun hoih in a kalpimi hna kha an rem hna lo caah an i fonh kho lonak a si.
Cucaah MTC/MDF hi CDF-Mara pumpi a rak dirhtu kha an si ko hna i, tulio CDF-Mara cu Mara NLD upa pawl nih an hruaimi kha asi ko. Tulio MTC/MDF hi ning cang tein a dirmi bu cu an si deuh hna i tulio CDF-Mara cu vote a sung i a chuak mi le a peumi le a kuaimi pawl kha an si. Mara Army le CDF-Mara an i fonh hnu in MDF hi cu Mara Army policy ning in a kal ti lo. Tulio CDF dang pawl policy hoih in a kal ve ko. Mipi nih Mara Army an policy he khan kan palh sual lengmang caah asi. Chin hmang loin mdf an hmannak zong bu 2 kha an i fonh khonak hnga caah asi.
Cucaah Chinmi dihlak nih phu 2 an i rem khawhnak hnga thlacam tu bawm deuh hna u sih law a hohmanh tanh loin kar lak dir in kan tlangtlak hna hi a tha deuh. Culo ahcun thisen tampi a luang sual lai i, Mara mino le cathiam tampi hi Chinmi he an i hlat chin lengmang sual lai i, AA le Arakan sin ah an pil chin lengmang sual lai. update
_________
A chunglei thil a hngalmi Mara upa 7 bia ka ruah hna hnu ah mah hi ka tialmi asi.