Hakha Ah Online In Passport Soknak Nicaan Laak Cia Khawh A Si Cang= Hakha Passport zung ah ramleng chuahnak Passport sok a duh mi hna nih online in nicaan laak cia (Boooking) khawh a si cang, tiah Hakha Passport zung nih theihternak a tuah. A ralai mi May 2 thawk in Myanmar Passport zung Website www.passport.gov.mm ah Online Appointment System in nicaan i laak cia khawh a si cang lai i, May 1, zinglei suimilam 9:00 in www.passport.gov.mm Website ah zoh khawh a si cang lai, tiah Hakha Passport zung nih theihternak an tuah.
Hakha lawng ah si lo in Myitkyina, Monywa, Lasho, Taungkyi, Magwe le a dangdang khua hna zong ah May 2 thawk in Online Appointment System thawk an timh, tiah theih a si. Singu Peng Wapoechat Khua SAC Ralkap Sakhan Cu Mandalay PDF Nih An Laak= Mandalay ramṭhen, Singu peng, Wapoechat khua SAC ralkap sakhan cu Mandalalay PDF nih an laak. Cu sakhan kahdohnak ah cun Lieutenant Colonel Tin Ko telh in SAC ralkap 11 an thi i minung 15 nih an hriamnam an chiah, tiah Mandalay PDF nih an thanh.>April 28 zinglei ah Singu peng, Wapoechat khua ah a um mi SAC ralkap sakhan cu Mandalay PDF nih an laak i SAC ralkap lei in Lieutenant Colonel Tin Ko telh in minung 11 an thi. Cu pin ah SAC ralkap 15 nih an hriamnam an chiah i Mandalay PDF nih hriamhme 19, 60mm Mortar pakhat telh in hriamnam dang tam ngai an laak. Cu kahdohnak ah cun Mandalay PDF lei in hliam a pu mi an um lo i Singu peng chung SAC ralkap sakhan pakhat zong an laak chap, tiah theih a si.
Naungcho peng, Thayetkone khua pawng zong ah SAC ralkap le Mandalay PDF kar kahdohnak a fak i SAC ralkap nih nifatin in vanlawng in kahdohnak an tuah. Mandalay PDF nih a biapi deuh mi SAC ralkap sakhan pakhat hnu pakhat in kan laak lai i SAC ralkap nawlngeihnak hram bongh ding in pehzulh in kahdohnak kan kalpi lai, tiah an thanh.
SAC Nih Kanpetlet Peng Ah Vanlawng In Bomb Thlak, Tualchung Mi Pakhat Nunnak A Liam! SAC nih Kanpetlet peng chung ah vanlawng in bomb an thlak i tualchung mi pakhat nunnak a liam pinah midang pahnih hliam an pu, tiah theih a si. Nizan April 28, chun hnu suimilam 1:30 hrawng ah Kanpetlet peng, Lundon khua ah SAC nih vanlawng in voi 2 bomb a thlak. Bomb ruang ah hin kum 68 hrawng a si mi tarpa pakhat a ke a bul i, a hliamhma a fah caah zaanlei 3:45 hrawng ah a nunnak a liam.
Kum 45 a si mi nu pakhat le kum 18 tluk nungak pakhat zong hliam an pu i, kum 45 tluk nu cu a hliamhma a faak ngai, tiah tualchung mi pakhat nih a chim. Bomb ruang ah hin sii-inn pakhat, sianginn pakhat, siangcachimtu umnak inn pahnih le inn pali an rawk dih, tiah Kanpetlet peng mizapi ukhruaitu phu nih a thanh. Lundon khuami hna cu khuachung ah um ngam ti loin ramlak ah an zaam hna, tiah theih a si. Lundon khua hi khuate inn 30 fai hrawng umnak khua a si i, SAC nih vanlawng in bomb an thlak lio ah tualchung hriamtlai phu le SAC ralkap kar kahdohnak a um lo, tiah tualchung mi nih an chim.