okang Hmunram SAC Ralkap Sakhan 5 Cu MNDAA Nih An Laak Chap, Sakhan 202 An Laak Cang. Shan ramkulh chaklei, Kokang hmunram chung SAC ralkap sakhan 5 cu Kokang MNDAA nih an laak chap i a dihlak sakhan 202 an laak khawh cang.Nizan December 3, zinglei suimilam 10:20 hrawng ah Mahu tlang ah SAC ralkap nih umhmun an khuarnak sakhan cu MNDAA nih an kah i suimilam 1:30 chung kaphnih kar fak ngaiin an i kah hnu chun suimilam 11:46 ah an laak khawh. Cun zinglei suimilam 10:16 ṭhiamṭhiam ah Ta-ai tlang hram ah ralkap nih umhmun an khuarnak sakhan 3 zong an kah i suimilam 11:16 ah an laak khawh, tiah theih a si.
![](http://teachexclusive.com/wp-content/uploads/2023/12/ww.jpg)
Cu pin ah zinglei suimilam 10:00 hrawng ah Toneshan hmunram, Laukshukok khua thlanglei tlanghrawn ah SAC ralkap umhmun an khuarnak 527 Battalion sakhan cu MNDAA nih an kah i, kaphnih kar suimilam 5 chung an i kah hnu zanlei suimilam 2:48 ah an laak khawh. Cu sakhan kahdohnak ah cun ralkap 10 an thi i hliampumi zong an um, hriamnam zeimawzat zong an laak khawh, tiah theih a si.
Nizan December 3, zinglei suimilam 9 hrawng ah Theinni pengkomh, Nantsalit Byuha sakhan in a zaammi SAC ralkap 6 cu MNDAA nih an tlaih hna i an i putmi hriamnam zeimawzat zong an laak khawh.
1027 Operation ni 38 tiang ah SAC ralkap sakhan 202 cu MNDAA nih an laak cang i, Chinshwehaw, Monekoe, Kwanlone, Pansai le Konekyan tiin khuapi 5 an laak khawh cang pinah Chinshwehaw, Pansai le Kyinsan ramri Gate 4 zong an laak khawh. Myanmar ram chung hmunkip ah tualchung hriamtlai phu hna nih khuapi 19 an laak khawh cang.