Kan theih bantuk in kan ralkap nih teinak an hmuh khawhnak dingah abiapi bik cu Drone a si tiah an chim lengmang. Rihkhawdar le Tio sakhan an lak lio zongah Drone a si ko tiah an ti. Drone hi lungkhan in hman awk um sehlaw tampi hlawhtlinnak kan hmu lai, tu lio hi drone bettary kan chambau tuk tiah an ti caah Vaurawng zunthil nih Drone battery cawknak ah tlang an au i India Rs 2000000 an hmuh mi cu CNA kut a phan cang.
![](http://teachexclusive.com/wp-content/uploads/2023/12/w.jpg)
CNF hruainak in Chinland Council an dirh khawh cang i cu kong he pehtlai in cheukhat phu nih a doh mi zong an um ve.Chinland Council Conference cu CNF Headquarters, Victoria Camp ah December 4-7 tiang an tuah i palai 200 leng an kai kho tiah Chinland Council Conference nih cathanh ah a langhter. Chinland Council President ah Pu Zing Cung, Vice President ah Kanpetlet peng palai Pu Min Nyo, Vice President (2) ah CDF-Mara in Pu Bawi Kung, Secretary ah CDF Paletwa in Salai Paul, Joint Secretary (1) ah CNF in Salai Het Ni, Joint Secretary (2) ah Hakha peng Hluttaw palai in Pu Tial Ling hna hi thim an si. Chinland Council rian term 1 hi kum 2 tiah ri an khiah.
An dirh thar mi Chinland Council nih Chin ramkulh chung Hluttaw, Chin ramkulh cozah phu le Chin ramkulh chung biaceihnak hna cu ni 60 chung ah an dirh lai tiah Conference ah an thanh.Cu Chinland Council Conference ah Mindat peng, Kanpetlet peng, Falam peng, Tedim peng le Tonzang peng hna ah hram a bunh mi CNC-Mindat/CDF-Mindat, CDF-Kanpetlet, CNO/CNDF le ZFU/PDF-Zoland hna nih kan kai lai lo tiah December 5 ah cathanh an chuah ve.
An cathanh chung ah atu Conference hi Democracy phung he aa tlak lo, tlukruannak a um lo leng ah Chin miphun zapi lungrualnak kha a aiawh kho lai lo tiah kan hmuh tiah cathanh ah an ṭial. Atulio Chin ramkulh chung ah Chin miphun dothlennak phu pawl nih an lak khawh mi khua 9 a um cang i ralkap le dothlennak phu pawl karlak ah kahdohnak a fak kho mi a si tiah RFA nih a langhter.