Sittwe Ah SAC Ralkap Nih Tualchung Mi 53 An Tlaih Hna. Rakhine ramkulh, Sittwe khuapi Korea tilawng dinhnak hmun thlang ah a ummi tilawng khaltu hna le tualchung mi 53 cu SAC ralkap nih December 12 ah an tlaih hna, tiah theih a si. SAC ralkap nih an tlaihmi hna hi Sittwe, Pauktaw, Minpyia, Myo Oo, Minpyia le Kyauktaw peng mi an si i Sittwe No. 1 palik sakhan ah an chiah hna. Zeiruang ah dah tualchung mi hna hi an tlaih hna fiang in hngalh a si lo.
December 13 zing suimilam 11:00 ah Ann peng um SAC ralkap Tawhingtaung sakhan ummi nih duh paoh in hriamngan an kah ruangah Ann peng Ahtet khua hlun khuami pa pakhat cu hriamngan kuan nih a hliamh, tiah Khit Thit Media nih a ṭial. December 13 zanlei suimilam 4:28 ah SAC ralkap Mi35 nih Myo Oo khua um, hlan lio khua hlun a umnak Yadana Man Aung phura, Phaya Theintawgyi le phungki Biakinn cu a kah i a rawk. Cu pinah December 12 zanlei suimilam 5:00 hrawngah Pauktaw peng SAC ti ralkap tilawng chung in mizapi umnak hmun ah hriamngan an kah i Taungphu khua inn hnih a rawk, tiah theih a si.