MTC/MDF Nih An Uk Mi Hmunram Chung Ah CNA Hruai Mi Hriamtlai Phu Vialte Chuak Dih Ding In Nawlnak An Tuah- MTC/MDF nih Mara hmunram chung buainak a chuak mi kong he pehtlai in an uk mi hmunram chung ah buainak a chuah ṭhan ti nakhnga lo CNA hruai mi hriamtlai phu vialte chuak dih ding in nizan February 20 ah nawlnak cathanh an chuah.
CNA hruai mi Chinland Council chungtel Chin hriamtlai phu CDF ṭangṭi phu thazaang tampi nih MTC/MDF cu a hram bongh ding in tukum January thla dongh lei le February thla hramthawk ah ni thum chung voi 55 tiang hrawng Drone hmang in bomb he kahdohnak an rak tuah nain Maraland Defence Force (MDF) nih cun Chin miphun khat le khat kar ah buainak a karh chin lo nakding ah hriamnam le kahdohnak in teirul chamnak kan rak tuah lo, tiah Maraland Territorial Council – MTC nih an cathanh ah an langhter.
Chin National Army (CNA) hruai mi CDF ṭangṭi phu hna nih MTC/MDF uk mi hmunram chung ah sualnak ngei lo tualchung mi cu a ruang um lo in an tlaihkhih hna pin ah ralphaw ah an hman hna i kuli an phurhter hna. Cu pin ah tlanglo rian a ṭuan mi lo kal an kham hna i innzuat saṭil a lak in an thah i an ei tawn, inn an bauh i tangka le thilri zong an fir hna i Mara mizapi cung ah dik lo tuk in an cawlcangh mi ruang ah hmailei Chinram a ṭhanchonak ding ca dawnkhantu pakhat a si i kan lung a ṭha lo ngaingai, tiah MTC/MDF nih cun an langhter.
Maraland Territorial Council – MTC nih a uk mi hmunram chung ah buaibainak a chuah ti nakhnga lo CNA telh in MTC uk mi hmunram chung ah hriamnam he a cawlcang mi Chin hriamtlai phu vialte zong nih unau khat le khat kar ah buainak chuahter ti lo in le MDF ralkap kahdoh ti lo ding in le Mara mizapi cung ah a dik lo mi ṭhatlonak an tuahser mi vialte an ngol khawh nakhnga Mara hmunram chung ah um ti lo in, a rannak in an chuah nakhnga nawlnak kan tuah, tiah MTC nih an cathanh ah an langhter chih.
MTC/MDF nih Mara mizapi runven le humhimnak laakpiak ding cu Mara tonpumhnak ah Democracy phungning tein rak thanh le fehter cang mi a si bang in Mara mizapi le Mara hmunram humhim cu kan rian a si caah atu bantukin nawlnak kan tuah mi a ngai lo i a zul duh lo mi hna cung ah a cang kho mi thil kong ah Maraland Territorial Council/Maraland Defence Force nih ṭuanvo kan in la hna lai lo, tiah nizan February 20 i an cathanh chuah mi ah cun an langhter.
