Rakhine ram, Minbya ah ralkap chungtel 60 leng cu February 6 zinglei ah AA sin ah an i fonh caah mawṭaw 3 in an kalpi hna tiah khuami hna chim mi cherhchan in Western News nih a langhter.Minbya rambunh ralkap IB 380 cu a luancia January 28 ah AA nih an lak khawh i Minbya ah a tang mi IB 390 le 541 hna zong AA nih an kah cuahmah lio a si tiah a langhter.
Cun Minbya hrambunh 379 le 541 zong nihin zinglei ah AA nih an lak cang tiah thawngpang a leng tiah an ṭial fawn. Minbya le Mrauk U hna cu January 5 zinglei sml 9:30am thawk in Jet fighter vanlawng le Helicopter nih voi 30 leng bom a rak thlak tiah a langhter fawn. Cun February 5 zinglei sml 9:30am ah Mrauk U hrambunh IB 378 cu an lak khawh tiah AA nih February 5 zaanlei ah thawng an thanh. TCLP
SAC Nih Tuah Timh Mi Thimnak Ah Mipi I Tel Lo Ding In KIO Chairman Nih Ralrin Peknak Bia A Chim-SAC an nawlngeihnak pehzulh in a hmunh khawh nakhnga kum 2008 phunghrampi chirhchan in thimnak tuah an timh mi ah i tel lo ding in le miphun pakhat le pakhat kar buainak a chuahter khotu Pyituhsit cawlcanghnak ah mipi i tel lo ding in nizan February 5, Kachin dohthlennak kum 63 tlin camtuak an tuah mi biachimnak ah Kachin Independence Organisation (KIO) Chairman, General N’Ban La nih a chim.
SAC an sungh hnu zong ah phu khat le phu khat kar ah buainak a chuak kho mi a si caah SAC ralkap a dohtu phu khat le phu khat kar ah lung i khahnak le lung i hmuhthiamnak cu a herh ngaingai mi a si i, SAC ralkap nawlngeihnak a um ti lo hnu ah daihnak a chuah khawh ṭhan nakhnga ram mi dihlak nih ṭuanvo kan ngei cio, tiah General N’Ban La nih cun a chim.Kachin Independence Organisation (KIO) zong SAC ralkap a dohtu phu vialte he tonbiaruahnak kan ngei i, hriamtlai in kahdohnak ah aa tel mi phu hna he a herh ning in tonbiaruahnak ngei kho peng ding in timhlamhnak kan ngei.
Cu pin ah a sung cuahmah mi SAC ralkap nawlngeihnak a dongh sin in mipi humhimnak, zalong tein khuasaknak le phungning tein i ukhruainak hna cu papek in kan kalpi hna lai, tiah KIO Chairman nih cun forhfialnak a tuah. Pau dohthlen caan chung ah tualchung hriamtlai phu le mipi lungrualnak, ṭanrualnak thawng in hramhram nawlngeihnak a dihdongh deng cang caah SAC hruaitu hna le SAC ralkap pawl zong an lung a zor ning cu zapi nih hmuh khawh a si ko, tiah General N’Ban La nih cun a chim chap. TCP