AA+MDF Le CNA+CDFs Kahdohnak A Fak, AA Lei A Thi An Tam- February 25 ah Paletwa peng Mala khua pawng ah AA, MDF le CNA hruai mi mipi ralkap hna kahdohnak a chuak than tiah theih a si. February 25 kahdohnak ah CNA ralkap pahnih nih ram le miphun caah an nunnak an pek. MDF ralkap pakhat a nunnak a liam ve.
Cun nihin tiang thawngpang kan hlathlai khawh tawk ah AA lei 20 hrawng an thi tiah kan theih. Tutan kahdohnak ah AA ralkap 300-400 hrawng le MDF ralkap 150 hrawng an i tel. Theihternak: A hmunhma a um mi hna pehtlaih a har tuk rih caah kan theih khawh vial kan vun taar i thawngfiang deuh kan theih tikah tlamtling deuh in kan vun taar than lai.
SAC Ralkap Le Pyusawhti Nih Aungtharyar Khua An Khangh I A Ciam Dih- Sagaing ramṭhen, Kalaymyo peng Aungtharyar khua cu SAC ralkap le an kuttang pyusawhti nih an khangh i a ciam dih, tiah theih a si. SAC ralkap kuttang pyusawhti 200-300 kar hrawng nih In 50 hrawng a umnak Aungtharyar khua cu ni thum chung an khangh kong Siaphu khua mi pakhat nih The Chin Post ah a chim.
“SAC ralkap kuttang pyusawhti pawl hi media dang nih an ṭialnak ah cun 700 hrawng an si lai an ti nain, pyusawhti khua hi khua 12 an si caah khuate 12 chungin pyusawti hi 700 an phan kho lai lo. A tam bik 200-300 kar hrawng lawng an si lai,” tiah thawngpang a kan petu nih cun a chim. Aungtharyar, Hmandaw le Shiaphu khua mi hna cu a himnak hmun ah ral an hrial in an zaam dih, tiah theih a si.
February 24 ah SAC ralkap kuttang pyisawhti le CDF KKG kar kahdohnak a chuak i pyusawhti 30 hrawng an thi tiin CDF KKG ralkap hna nih an chim a theih kong tualchung mi pakhat nih The Chin Post ah a chim ve. Shiaphu khua mi cu an khua ning pi in an zaam i Tanbu Baptist Church ah tar le ngakchia minung 40 hrawng cu an i dor, a dang cu hmun dang ah an zaam dih, tiah a chim chap.
Shiaphu khua hi inndawng 500 hrawng a um mi an si i tar le ngakchia 40 hrawng hi Tanbo khua Baptist Church ah an i dor i, a dang khua mi kawl pawl hi Siaphu khua kiapkap le ramlak ah an zaam hna, tiah theih a si.SAC ralkap nih nawlngeihnak an laak hnu ah Sagaing ramṭhen, Kalaymyo peng Siaphu khua mi minung 12-15 kar cu an nunnak a liam cang, tiah Siaphu khua mi pakhat nih The Chin Post ah a chim.