Tedim Khuapi Kahdohnak Ruang Ah Tualchung Mi Pahnih Nunnak A Liam, Inn Hnih Zong A Kaang Chap- Chinram, Tedim khuapi ah nizan June 2, zan suimilam 9:00 hrawng in tuzing deika tiang SAC ralkap le Chin hriamtlai phu unau kar kahdohnak a fak i zinglei suimilam 3:00 hrawng ah Luaibual sang inn hnih a kaang. SAC ralkap kut in tualchung mi pahnih nunnak a liam, tiah Tedim khuapi kiangkap ralzaam mi nih an chim.
“Mualtuk SAC ralkap sakhan in hriamngan in kahdoh an bawmh hna i Lelum sang chung sehzung hrawng ah a tlak zumh a si, hriamngan he hriamhme he pehzulh in an kah, zing suimilam 1:00 hrawng ah chikkhat cu a dai nain caan rau lo te ah an i kap ṭhan, zinglei khuadei hnu ceo ah a dai ṭhan,” tiah tualchung mi nih an chim.
“Zing suimilam 3:00 hrawng ah inn a kaang , tuan deuh i a rak kanghnak hrawng si dawh a si, a hmunhma belte fehter a har, inn hnih hrawng cu a kaang lai,” tiah tualchung mi nih cun an chim.
“June 1 ni ah Catholic Biakinn tang lampi in ralzaam ding ah motorcycle in a kal mi tualchung mi pahnih cu SAC ralkap nih Sniper in an kah hna i hliamhma fak ngai an tuar, nizan June 2 ni zong ah SAC ralkap nih Sniper in an kah ṭhan hna i nu pakhat le midang pakhat an thi,” tiah tualchung mi nih an chim.
Tedim khuapi chung kahdohnak cu zarh khat leng a rau cang i kahdohnak ruang ah tualchung mi 13,000 hrawng cu a himnak hmun kawl in an zaam hna. A luancia May 27, June 1 ni le tuzing dei hlan ah tiin SAC ralkap nih timh ciammam tein inn an khangh ruang ah inn 50 leng a ciam cang. Cu pin ah kaphnih kar kahdohnak ruang ah tualchung mi 4 nunnak a liam cang i minung 10 hliam fak ngai an tuar, tiah theih a si.TCP