Bungzung SAC camp laak kahdohnak ah Chin ralkap nih hriamnam zun 30 leng an laak i raal paruk a nung in an tlaih hna. Hakha peng, Bungzung SAC camp laak kahdohnak ah Chin ralkap nih SAC hriamnam zun 32 le kuanzen tampi an laak khawh pin ah a nung in raal paruk an tlaih hna tiah kan theih. Bungzung SAC camp cu Chin ralkap phu komh nih December 17 zaan in an kah i December 18 chun suimilaam 12:00 hrawng ah an laak khawh. https://www.facebook.com/100063834890769/videos/672692274744208
Hriam an laak mi hna cu MA, Ozi, G3, 60mm peeng tawi, 60mm peng sau le M16 hna an si. Zenthong an laak mi ahhin G3 zenthong a tam bik i 60mm bomb thei 50 leeng aa tel. Cun, Pistol zong zun 4 an laak chih tiah CNA ralbawi pakhat nih HP ah a chim.
Cu kahdohnak ah cun SAC ralbawi captain rank pakhat tel in pariat an thi i a nung in paruk an tlaih hna. A dang ralhraang cu an zaam tiah theih a si.Kahdohnak ah Chin ralkap pahnih nih ram le miphun caah an nunnak an pek tiah kan theih. Bungzung SAC camp laak kahdohnak cu CNA, CDF-Hakha, CDF-Thantlang le CDF-KKG i bawm in an tuah mi a si.THP