Tonzaang Khua Kahdohnak Ah SAC Ralkap 10 An Thi, Hliamtuar Zeimawzat An Um- Chinram, Tonzaang Khah-La-Ya SAC sakhan kahdohnak cu May 15 khan CNA le CDF ṭangṭi phu nih an thawk i, kahdohnak hi kalpi rih cuahmah a si. May 15-17 tiang kahdohnak ah SAC lei ralkap 10 an thi i, hliamtuar zeimawzat an um, tiah CNA chimnak nawlngei Salai Htet Ni nih The Chin Post ah a chim.
Kahdohnak ah aa tel mi Chin ralkap nih an chim ning ah SAC ralkap hi ZRA nih an bawmh hna, tiah theih a si. Tonzaang khuapi kahdohnak bawm ding ah a kal mi SAC ralkap hna cu Nakzang khua ah Chin ralkap nih an rak kham hna i, SAC ralkap tlaih mi meithal 3 an laakpiak hna. A langhlat in ruak pahnih an hmuh kong Chin ralkap lei nih a chim.
Atutan kahdohnak ah hin Chin ralkap lei zong in nunnak a liam mi an um ve i, CNA in ralkap pakhat le CDF-Hakha in ralkap pahnih nih nunnak an pek ve pinah hliamtuar zong an um, tiah kan theih. Kahdohnak ah hin SAC lei nih vanlawng zong an hman i, voikhat lebang cu Chin ralkap rual rawl-einak pawng te ah bomb a tla nain vanṭhat ah a puak lo, tiah Chin ralkap pakhat nih a chim.
Hakha, EPC Sang Ah Mifir Nih Inn An Bauh, Phaisa MMK Sing 400-500 Fai An Fir- Nihin 2024, May 19 (Zarhpini) ah Hakha, EPC sang ah a um mi Pu Ṭial Thang te inn cu mifir nih an i pumh kar ah innka an bauh i Kawlram phaisa sing 400-500 fai an firpiak hna tiah theih a si. “Mifir nih an bauh caan hi zinglei sml 10:00-12:00 karlak ah a si,” tiah inn neitu chungkhar nih an chim.
“Tuthla chung ah Hakha khua ah misual nih inn bauh le thilfir a um kan thei lo. Grace Baptist Church ah tuzing kan vai pum le inn kan lawi tik ah cun inn a rak i bauh cang. Kan thilri tampi an rak sual len. Atu tiang ah thil a tlau tiah kan i fianmi cu phaisa hi a si ko,” tiah inn neitu nih a chim. Pu Ṭial Thang te chung cu Senthang peng, Lungrang khuami an si. Hakha ah chungkhar he khua an saknak kum 17 tluk a si cang. TCP