CNA Nih An Tlaih Mi ZRA-EC Ralkap 1 Cu Media Cheukhat Nih An Thah An Ti Nain Nungdam Tein A Um- Chinland ralkap CNA hruainak in ṭangṭi phu hna nih kahdohnak lio ah an tlaih mi ZRA-EC ralkap Sut Lam Khai cu Media cheukhat nih a thi ti ah an langhter nain nungdam tein a um kong, Chinland Information Center nih nizan May 16 ah phungning tein a langhter.
Tlaih a tong mi ZRA-EC ralkap Sut Lam Khai cu 2024, April 3 ah Tedim peng, Darkhai khua kahdohnak ah CNA le ṭangṭi phu hna nih an tlaih, cu hnu ah CNA nih an thah i May 14 ah a ruak tello bu in vuinak an tuah, tiah a hmanthlak he ZRA ṭanhtu hna nih Media le Social Network cheukhat ah an tarlangh. Hi kong he pehtlai in tlaih a tong mi ZRA-EC Sut Lam Khai nih a chim mi cu Chinland Information Center nih an langhter.
“Keimah cu May 14 ah an vui ti ah an langhter nain ka thi lo, CNA sin ah nungdam tein ka um ko timi ka nu/pa chimh kan duh hna, CNA sin ka um lio ah ka paw a faak i ka lu zong a fah caah sii-khan ah voi 2 an ka kalpi, ṭha tein an kan zohkhenh ko, fiang tein theih hlan ah atu bantuk in a thi lo mi a thi tiin Media i an ka tarlangh mi cung ah ka lung aa nuam lo ngai, ka lung a ṭha hrimhrim lo, chungkhar ca zong ah a poi ngai mi thil a si, mah bantuk hi tuah ding a si lo timi cah kan duh hna” tiah ZRA-EC Sut Lam Khai nihcun a chim.
Chinland ralkap CNA hruai mi ṭangṭi phu hna le ZRA-EC kar kahdohnak kong he pehtlai in Media cheukhat le Social Network cheukhat ah tinh chih tein miphun pakhat le pakhat buainak/huatnak chuak ding in an ṭial mi pawl a tam ngai, tiah kan theih. LM