Hualngoram Police Nih Rithaisi Tamlak An Tlaih- Nizan March 29, zan suimilam 10 hrawngah Mizoram lei i phurh ding rithaisii Heroin tam lak cu Hualngoram chung ah Hualngoram Police nih an tlaih. Rothaisii ngeitu hi Pi Zing Ṭial(kum 51) d/o U Phai Phai, Sekan khua; Rihkhawdar ward 1 i khuasa lio mi le Pi Lalrami(kum 44) d/o Pu Chawn Tin Zam, Sekan khua ṭhiamṭhiam; Rihkhawdar ward 2 i a um lio mi hna an si. Rithaisii an tlaih mi Heroin hi bawm 228, international merket ah ₹82,00,000 man hrawng le rithaisii an zuarnak phaisa ₹4,33,000 he an tlaih chih hna.
Rithaisii an tlaih mi he pehtlai in motor khaltu Agape Thang(kum 36), s/o Pu Thawng Hlei Kulh, Tahan khuangbawih veng le ritsii a zuartawn mi Pu Ngun Khual(kum 31) s/o Pu Than Ṭi, Pu Lalsailo(kum 25) s/o Pu San Dum, Sekan khua veve zong Hualngoram Judiciary board biaceih ding ah an tlaih hna. “Hualngoram chung mizapi ukhruainak cozah kalpi cuahmah lio a si i, cozah phungphai upat buin rithaisii khamnak kong ah rianṭuan hung kan bawm u,” tiah Hualngoram Police nih mizapi sin sawmnak an tuah.
Hsihseng Khuapi Kan Uk Khawh Ṭhan Cang Tiah SAC Nih Thanh- Shan ramkulh, Pa’O hmunram chung mahte i ukhruainak an kalpinak Hsihseng khuapi cu kan uk ṭhan khawh cang, tiah SAC nih nihin March 30 ah an thanh. A luancia January 26 ni thawk in Pa’O ralkap PNLA nih an uk mi Hsihseng khuapi cu laak ṭhan ding ah February 27 ni in SAC ralkap le Pyituhsit phu nih kahdohnak an tuah i, ni 32 a rauh hnu March 25 ni ah Hsihseng khuapi cu kan uk khawh ṭhan cang, kahdohnak ah PNLA le tualchung mi hliam a pu mi an um, tiah SAC nih an thanh. PNLA Chairman Major General Khun Thurein nih cun, “Hsiheng khuapi cu SAC nih a ningpi in an uk lo, kaphnih kar i kahdohnak hmun pakhat a si i, Hsihseng khuapi kan uk cang ti cu a dik lo mi thawng a si,” tiah RFA a chim ve.
Hsihseng khuapi cu kaphnih kar i kahdohnak hmun ah a can caah tualchung mi cu khuachung ah lut rih lo ding in March 27 ni ah PNLA zong nih an thanh ve. Pa’O hmunram chung mahte i ukhruainak Hopang, Hsihseng le Pinlaung peng hna ah a luancia January 21 thawk in SAC ralkap le PNLA kar kahdohnak a chuak. Cu kahdohnak ruang ah cun tualchung mi 53 nunnak a liam i minung 68 hliam an tuar, tiah PYO nih March 26 ni ah an thanh.TCP