Hakha ah Mipi phaisa hal hmang mi le mitha lobawmtu Non CDM pawl kan kah cang hna lai- Shiangkung
Ralhrang Luh Lo Ngah Lo Kong- Hakha ah chungkhar cazin an chek cuahmah. Mino min cazin an kawl. Zung ah ra te u, an ti. Zung an va kal tikah na fa, na rak chuahpi a hau, an ti hna lai. Fale a chuahpi lomi cu tangka an hal hna lai. Cu tangka cu Non-CDM zungriantuantu le ralhrang ralbawi pawl nih an zal ah an i sanh lai. Receipt pek a um lai lo, a um zongah an khangh te lai, bank ah a lut lai lo, bank ah tlawmpal a luh zongah ralhrang cozah caah a si lai. Hmatpungtin le license dangdang in siseh, thihphaih le sualkawl a phunphun in siseh, tlaih i thongtlak maw na duh, ralhrang tuan dah, ti zong a um chin kho. Cucaah dothlennak ah za ah za in tang law na mipum le na tangka in CNF/A asiloah CDF-Hakha ah i pe lawlaw, cuticun hi bantuk mizapi tlaihremtu ralhrang hi rianrang tein kan tei khawh lai.
Atu lioah Hakha khuachung ah tangka hal an tam. Dothlennak bu min keng bantuk, ralhrang rual bantuk, mizapi hro i tangka pek hnu lawngah a kalmi, a pe ciami sin ko ah a kalhnawh thanmi, a cunglei kan chim cang bang zung min in tangka hal zong an tam. Mizapi caah lungrethei a si. Cucaah cu bantuk mi cu ralhrang le damiah an si caah thawng kan thanhcolh u, kan tlaih khawh hna lo a si le a kah in kan kah hna lai.
Cu bantuk lio caan ah, caantha i lak in ralhrang he riantuan ti i pawcawm le rum na tim sual maw, an doh hna caah an sual chin ve i si ti phun in khua hna na ruat sual maw, kei kaa ceih lo ti phun in na um rih sual maw? Dothlennak kan tuah cu nangmah le na techin fapar chan tiang, kan ram le miphun luatnak caah a si. Nihin ah dothlennak caah na pek sian lomi vialte kha ralhrang nih duhsah tein an chuh dih te lai i nangmah le na techin fapar tiang sal ah a kan ser rih lai. Kum 70 leng cu bantuk ral a tuar cang mi hna, lungfim caan a za cang lo maw?
Ralhrang luh lo ngah lo in thil an kalpi hi an thazaang a der caah a si. Doh caan tha bik a si. Hun i hne rih, hun i hrim rih.“Na facang mu khat le na tangka fang khat nih ram le miphun a thlen khawh, nunnak le thisen cu kanmah nih kan thap lai.”Hakha Campaign For Justice
2024 March 21 ah CDF-Hakha nih Hakha khuachung pengkomh palek zung kan va kah. Kahdohnak a fah caah Ralhrang nih hriamngan tam lak an hman nain Bawipa thawng in kan him dih. Nikhua a chiat caah le zan ah kahdoh a si caah a thi le hliamhmi fiang in hmuhtheih khawh a si lo. Mizapi nih nan kan dirkamhnak a lak kan siter lai lo tiah thawng kan in thanh hna.
Ralhrang nih hramhram in ralkap tlak ding mincazin an lak rih caah 2024 March 19 ah CDF-Hakha nih kahdohnak kan tuah. Zanlei suimilam 6:30pm ah ပြည်နယ်အစိုးရရုံး cung a um mi 39 channel Drone card (Hakha phone line a chitter dih tu) zong kan hrawh. 2024 February 19 ah a rak phanmi drone card 2 lak ah pakhat a si. Mah hlan i Hakha ralhrang nih an hmanmi drone card hna cu 16 chennel lawng an si.2024 March 20, suimilam 3:20pm, paleklen sianginn ah um hmun a khuarmi ralkap le palek hna cu CDF-Hakha nih kan va kah hna i pathum an i hliam tiah thawng kan theih.
Mincazin pehzulh in an lak rih ko ahcun kahdohnak a zual khawh caah mizapi zong ralring tein um dingin thawng kan in thanh hna. Cu bantukin hramhram in ralhrang ralkap tlak a duh lo i ram le miphun caah Pau dothlennak ah ka pumpe ve lai a timi paoh caah CDF-Hakha nih innka kau piin kan on pin ah lunglawm tein kan in cohlan hna. Chinland Defense Force – Hakha