Indy Nubu Indiana Chin Women Fellowship nih kan Ralkap hna caah kan cawkpiak mi hna Motor cu Camp a phan cang. Misual Ralhrang teinak ah le Kạn dawt kan Chin ralkap hrang ah thahnem mi si hram ding in Bawipa nih Thluachuah kan pek piak ko seh.
CDF-Thantlang Bual Area Chung Ah Nicaan Luan Thil Zuar Le Zuar Lo Zohfelnak An Tuah= Chinram, Thantlang peng, Bual tlang chung ah CDF-Thantlang Bual Area Police Inspector Salai Bawi Hmun Lian hruainak in nicaan luan thil zuar le zuar lo zohfelnak an ngeih kong Chinland Defense Force-Thantlang Bual Area Administration nih nihin March 23 ah an thanh.
Atu bantukin CDF-Thantlang Bual Area nih an hmunram chung ah dawr thil an zohfelnak ruang cu Bual tlang chung ah dawr a ngei mi hna nih a tharhlam mi thil an zuar i ngandamnak ca ah ṭih a nung mi thil le nicaan a luan mi thil an zuar nakhnga lo papek in ṭuan lio a si, Tikir (A) khua in an thawk i Bual tlang chung khua kip ah pehzulh in tuah timh a si kong CDF-Thantlang Bual Area Administration nih cun an thanh.
Hi kong he pehtlai in CDF-Thantlang Bual Area Police Inspector Salai Bawi Hmun Lian nih cun, “Kan hmunram chung ah nicaan luan mi eidin sual ruang ah dam lo le pawfah a um pah lengmang i Bual Area Police Department meeting biachahnak bantukin dawrthil zohfel hram kan vun thawknak a si, atu tiang kan zohfel mi khua dawr cheukhat ah cun nicaan luan ngai mi thil zong kan hmuh i kum 2 a luan cang mi thil zuar lio mi zong an um caah Bual Area Police Department nih kan laakpiak dih hna,” tiah The Chin Post ah a chim.