Kanan Khua Hliamtuar Mi Hna Cu SAC Ralkap Nih Kalaymyo Ah Thlopbul An Sianh Hna Lo! Sagaing ramṭhen, Tamu peng, Khampat khuapi pawng Kanan khua bomb thlaknak ah hliam a pumi tualchung mi hna cu Kalaymyo siizungpi ah i thlopbul ding in kalpi an si nain SAC ralkap nih khuapi chung luh an sianh hna lo, tiah mi bawmchantu nih an chim. “Bomb thlaknak in hliam a tuarmi tualchung mi hna cu Kalaymyo siizungpi ah kalpi kan timh hna nain Dah-Kah-Sah ralbawi pakhat nih Kalaymyo khuachung luh hrimhrim a kan sianh li i kan kirpi ṭhan hna,” tiah mi bawmchantu phu chungtel pakhat nih media ah a chim.
Tualchung hriamtlai phu nih an ukmi Khampat khuapi pawng Kanan khua cu SAC ralkap nih raltuknak vanlawng in bomb an thlak ruang ah ngakchia telh in tualchung mi 17 nunnak a liam i minung 20 hrawng hliam an tuar. Hliampumi chung in nunnak ca tiang thinphang dirhmun a phanmi an tam ngai caah tualchung hriamtlai phu in mizaw zohkhenhtu hna nih a si khawh tawk in an thlopbul hna nain a zualhma deuhmi an tam ngai ruang ah lungre a thei ngaingai, tiah mi bawmchantu nih cun an chim.
Mi bawmchantu phu ah aa telmi tualchung hriamtlai phu chungtel pakhat nih cun, “Atu bantukin SAC ralkap nih bomb an thlaknak a ruang bik cu Kanan khua ah tualchung hriamtlai phu training dih lawmhnak an tuah tiin Dalan nih thawngpang dik lo an pek ruang ah a si,” tiah Delta News Agency ah a chim. A hlan deuh zong ah SAC ralkap kut in hliam a tuarmi tualchung mi hna cu Kalaymyo siizungpi ah i thlopbul an rak sianh hna lo, tiah theih a si.
Kyauktaw Peng SAC Ralkap Sakhan In Ralkap 200 Leng Nih Hriamnam An Chiah, Rakhine ramkulh, Kyauktaw peng um taungshe beohar sakhan in SAC ralkap 200 leng cu hriamnam an chiah i Myo Oo peng um Thincittaung sakhan zong AA nih an laak, tiah theih a si. January 7 zanlei suimilam 4:00 hrawngah Rakhine ramkulh, Myo Oo peng Thincittaw sakhan cu AA nih a dihlak in an laak i SAC ralkap thilri le zen-kuan tampi zong an chuh hna, tiah theih a si.
January 7 thawk in Paletwa peng nitlak lei um SAC ralkap sakhan dihlak cu AA nih an laak i Paletwa peng hmunram vialte cu SAC ralkap an um khawh ti lonak hmun si ding in an i zuam cuahmah i, ni tlawmpal ah a dang ralkap sakhan zong laak dih dingin an i timhnak kong an thanh.
Shinletwa sakhan kahdohnak ah India ram chung ah a rak zaam mi SAC ralkap 151 cu Assam Rifle an bawmh hna i, January 2 ah SAC vanlawng nih Aizawl khua pawng Vanlawng bual ah a rak laak hna.
SAC ralkap nih hriamnam chiah nan duh ahcun zeitik caan poh ah pehtlaih khawh kan si tiin AA nih thanhnak an tuah. TCP