CNA le CDFs nih nithum chung ngollo in an kah hnu ah Lailenpi ralhrang sakhan Mizoram Saiha Dist, Lakhi khua Assam Riffle camp ah an i Ap tiah theih a si. Kan theih bantuk in Lailenpi ralhrang sakhan an kah ah ralhrang ralbawi zong thah a si. Ralhrang dang vialte cu an zam dih. Meithal an i zampi hna nain bomb le meithal kuan pawl tampi an zam tak.https://www.facebook.com/CDM.thapetu.pa/videos/1383660362263538
Lailenpi Ukhruainak Rian Cu CNF/A Le CDF-Mara Nih An Tawlrel Lio. Chin ramkulh Lailenpi khuapi ah ukhruainak ṭha tein a kal khawh nakding ah CNF/A le CDF-Mara nih an tawlrel cuahmah lio, tiah theih a si. Salai Htet Nih nih cun, CDF-Mara hruainak in hmunhma humhimnak le upadi ning tein rianṭuan khawh a si nakding ah CDF -Mara he an tawlrel cuahmahnak kong le Lailenpi khuapi ukhruainak cu anmah Lailenpi khuami hna nih an ukhruai te lainak kong a chim.
SAC ralkap nih Lailenpi sakhan an sungh lo nakding ah Fighter cu voi 10 nak tlawm lo an hman i voi 29 bomb a thlak, tiah CDF-Mara sinin theih a si. Mara nichuahlei hmunram dihlak cu CDF-Mara kuttang ah a um dih cang i ukhruainak rian zong thawk khawh a si nakhnga CNF/A he ceihmainak an ngeihnak kong cu caan karlak Mara ram Council ṭuanvo ngeitu nih a chim.
Lailenpi khuapi laak hlan ah caan karlak Mara Ram Council tang ah Local Council 6 an ser i Local Council in khuate 30 hrawng khuate ukhruainak council an rak ser. Lailenpi khua kahdohnak ruangah khuami hna cu an innlo an zaamtak dih. Hmunhma thianhhlimnak tuah dih hnu ah caan karlak Mara ram Council zung cu Lailenpi ah hun a si lai i Mara hmunram vialte an ukhruai lainak kong Mara Ram Council ṭuanvo ngeitu nih cun a chim.
Rithaisii le Hriamnam Phurhzuarhnak Kong Le Non CDM Hna Kong Ah CDF Zophei Nih Ralrin Peknak Cathanh Chuah. CDF – Zophei nih zuu le rithaisii he aa pehtlaimi paoh cu Zophei ram chung ah zuar, din le tawnghtham a ngah lonak kong le SAC kuttang ah rian a ṭuan rihmi Non-CDM hna cu an ram chung ah luhchuah an ngah ti lonak kong pinah Zophei ram chung ah hriamnam phurhzuarhnak kong he pehtlai in theih a herhmi kong cu nizan November 27 ah cathanh an chuah.
“Zophei ramchung ah zuu, rithaisii le a thlithup in meithal le hriamnam dangdang phurhzuarh a tam ngai caah Zophei ramchung ah hi bantuk thil nih ṭhatlonak tampi a chuahpi. Cu pin ah SAC kuttang ah rian a ṭuan rihmi Non-CDM cheukhat cu Zophei ramchung ah a lutchuakmi an um pah caah Zophei mipi ca ah a him lo i ṭihnung an si,” tiah CDF – Zophei nih an thanh.
Zophei ram chung ah zuu le rithaisii a si mi poahpoah tawngh lo ding le luh pi lo ding, a thlithup in hriamnam phurh lo ding le phurh a duh mi nih CDF – Zophei sin ah phurhzuarh khawhnak License rak tuah ding, hriamtlai phu ca ah phurh mi a si ahcun mahle phu cio nih chuahpiakmi theihpinak ca a si lo ah lungtlinnak ca tel lawng ah Zophei ramchung Gate pawl ah luhchuah khawh a si lai.
Cu pin ah SAC kuttang ah rian a ṭuan rihmi Non-CDM vialte cu Zophei ramchung ah luhchuahnak nawl phihkhar an si, tiah CDF Zophei nih an cathanh chuahmi ah an langhter. CDF – Zophei nih ralrin peknak a thanhmi nawl ngai lo in a zul duh lomi cu a herh ning in dantat nan si lai, tiah cathanh ah cun an langhter chih.TCP