Monywa Peng, Kyarpaing Khua Ah Tualchung Mi 11 Cu SAC Ralkap Nih An Khangh Hna. Sagaing ramṭhen, Monywa peng Kyarpaing khua cu nizan December 2, ah SAC ralkap le Pyusawhti pawl nih an khangh hnu ah sualnak ngei lo tualchung mi 11 zong an tlaih hna i an khangh chih hna, tiah tualchung mi nih an chim. “Nizan December 2, zinglei suimilam 8:00 hrawng ah Kyarpaing khua cu SAC ralkap le Pyusawhti nih luhhnawh in an khangh i tlakrawh inn chung ah tualchung mi 11 cu an hrenhkhumh hna i an khangh chih hna,” tiah tualchung hriamtlai phu in chungtel pakhat nih a chim.
December 1, zanlei ah Tawpu (Ywathit) Pyusawhti khua cu tualchung hriamtlai ṭangṭi phu nih luhhnawh in an kah hnu December 2, zinglei ah SAC ralkap le Pyusawhti pawl nih Kyarpaing khua cu an khangh i tualchung mi 11 zong tlakrawh innchung ah hrenhkhumh in an khangh hna, tiah theih a si.
SAC ralkap le Pyusawhti pawl khanghnak ruang ah inn 400 hrawng a umnak Kyarpaing khua cu a ningpi ti tluk in a ciam dih, tiah theih a si. “SAC ralkap le Pyusawhti pawl cu Kyarpaing khua an khangh dih zanlei suimilam 3 hrawng, khua an chuahtak hnu ah tualchung hriamtlai phu nih mei an phalh i tlakrawh innchung ah hrenhkhumh in khangh a tongmi tualchung mi 11 ruak cu an hmuh hna,” tiah tualchung hriamtlai phu in chungtel pakhat nih a chim. TCP update