THE CHIN POST nih biahalnak a tuahmi ah Malaysia CRC president nih Chin National Day kongah fianternak a tuah. A chimmi cu, CND cu tuah dingin mipi lungtlin a si pinah thantar Flag pakhat lawng hman si she tiah lungtlin a si. Cu lungtlin a si hnu ah CND ah zeibantuk Flag dah kan tar lai timi kongah upa tuanvo ngeitu kutthlirnak an tuah. CNF/A Flag cu mi tam deuh duhnak kutthlirnak nih a tei. Cu cu Falam nih an duh ti lo caah 2024 Chin National Day ah kan I tel lai lo tiah an ti. Hmaikum lei zongah hibantuk hi um ti hlahseh a tha tiah CRC president nih a chim chap.
Falam unau hna hi Hakha Thantlang he an thinlung hmunkhat teah funtom hi an duh taktak lo a si ko. Cuhlan zongah thantar kongah an chimceih a tam ngaingai. Chinram ah Laimi ka si aa timi ahcun Hakha le Falam bak kan si ko nain thinlung in aa hlat ngaingai mi kan si. Dohthlennak kong zongah CNF/A he ifonh a duhbak lomi an si. CNA he ifonhnak cun AA le ZRA he um kha an ithim deuh. Atu tiang a si, khuika hmun hmanh ah an si deuh ko rua. Falam ti tikah miphun tampi an um, cu chungah Hualngo le Falam mi aa timi hi an si hna. Adang pohpoh cu an thinlung ruahnak a tha.
Arakan Army (AA) Nih Minbya Peng Ah SAC Ralkap Tilawng Pakhat An Hrawh Chap- Rakhine ramkulh, Minbya peng kahdohnak ah SAC ralkap tilawng pakhat cu AA nih nizan February 12 ah an hrawh kong chaklei hriamtlai phu unau thum nih an thanh. “Le khuapi tiva zulh in a kai mi SAC ralkap tilawng cu Kyaryepin khua pawng ah AA nih an rak kah i a pil, Rakhine ralkap nih an hrawh i a pil mi SAC ralkap tilawng 4 a si cang,” tiah Minbya khuapi tualchung mi pakhat nih a chim.
A luancia February 7 le 8 ni zong ah Kyauktaw peng, Apaukwa khua pawng ah SAC ralkap tilawng pathum cu AA nih an hrawh i tichung ah an rak pil. Atu bantukin AA nih SAC ralkap tilawng an hrawh mi kong ah SAC lei nih cun zeibantuk thawng hmanh an thanh rih lo. Minbya khuapi chung ah a um mi Khah-Mah-Yah 379, Khah-Mah-Yah 380, le Khah-Mah-Yah 541 Battalion pathum a zate in a luancia February 6 ni ah Rakhine ralkap AA nih an laak hnu ah khuapi a ningpi in AA nih an uk cang.
Chaklei Hriamtlai Phu Unau Thum Le Tlangcung Hriamtlai Phu I Fonh Ding In Kan I Zuam Cuahmah – NUG President- “Chaklei hriamtlai phu unau thum le tlangcung hriamtlai phu pawl an i fonh khawh nakhnga kan i zuam cuahmah lio a si,” tiah NUG caan karlak President Duwa Lashi La nih nizan February 12 ah tuah mi a voi 77nak Union Day ah a chim.”Rakhine ralkap AA, Ta’ang ralkap TNLA le Kokang ralkap MNDAA an i telnak chaklei hriamtlai phu thum nih biapi ngai ah an chiah mi phunglam zohchih in hmun khat ah kan i fonh khawh nakhnga kan i zuam cuahmah,” tiah NUG caan karlak President nih a chim.
“NUG le Kachin, Karen, Karenni, Chin tiin tlangcung hriamtlai phu hna nih a luancia January 31 ni ah an rak thanh mi lungtlin hnanltlaknak cu a biapi ah chia in a taang mi tlangcung hriamtlai phu dang zong an rak i fonh ve khawh nakhnga kan i zuam cuahmah lio a si,” tiah a chim.”Shan ramkulh chung tlangcung hriamtlai phu le Mon ramkulh chung tlangcung hriamtlai phu pawl zong an i fonh ding kan hngak i kan i ruahchan ko.
“Tlukruannak le mahte khuakhan lairel khawhnak cu a biapi bik ah ruat in bawi ah i ser in mi uk duhnak, thleidannak lungput vialte zong hramhram nawlngeihnak he a hram bongh chih caan a cu cang. Cu pin ah mipi cung ah fahnak tlunter lo in humhimnak laakpiak in kan runven hna ding cu kan rian a si,” tiah NUG caan karlak President Duwa Lashi La nih cun nizan February 12 ah tuah mi a voi 77nak Union Day ah a chim. TCP