SAC Vice Chairman Hruainak In Tonbiaruahnak An Ngeih Lio Ah Drone 5 In Bomb An Thlakhnawh Hna Caah Ralbawi Pathum An Thi I Minung 30 Leng Hliam An Pu– Mon ramkulh, Mawlamyine khuapi nichuah-thlanglei Division Heaquaters ah SAC Vice Chairman Soe Win le a kuttang pawl ralkap kong he pehtlai in tonbiaruahnak an ngeih lio ah tualchung hriamtlai phu nih Drone 5 in bomb an thlakhnawh hna caah SAC ralbawi pathum an thi i minung 30 leng hliam an pu, hliam a pu mi chung ah SAC Vice Chairman Soe Win le Lieutenant General Nyunt Win Swe zong an i tel kho, tiah Alpha Bats Drone Force in ṭuanvo ngei pakhat nih a chim.
Nihin April 9, chunhnu suimilam 1:30 hrawng ah Mawlamyine khuapi nichuah-thlanglei Division Heaquaters (Yah-Tah-Khah) Sport Hall ah Vice Senior General Soe Win hruainak in kahdohnak kong he pehtlai in ceihmainak an ngeih lio ah tualchung hriamtlai phu nih Fixed Wing Drone pathum in bomb an thlakhnawh hna pin ah Fixed Wing Drone pahnih in Helicopter a dirnak hmun ah bomb an thlak, tiah theih a si.
“Nihin Drone bomb thlaknak ah cun Hall chung ah tonbiaruahnak a ngei mi General Staff Officer Grade 1 le Major General 4 telh in Warrant Officer 30 leng an i hliam i minung pathum cu tuzan ah an thi, aa hliam mi chung ah Vice Chairman Soe Win le Command Commander Lieutenant General Nyunt Win Swe zong an i tel kho, Naypyidaw lei zong in an pehtlai kho ti hna lo,” tiah Alpha Bats Drone Force in ṭuanvo ngei pakhat nih a chim. Cu pin ah Alpha Bats Company nih SAC Helicopter pahnih cu Fixed Wing Drone pahnih in bomb an thlakhnawh caah Helicopter pakhat a rawk kho, tiah Alpha Bats Drone Force nih an chim.