SAC Ralkap Nih Monywa Peng Htanpinhla Khua Inn 30 Leng An Khangh. Sagaing ramṭhen, Monywa peng Htanpinhla khua cu nihin January 30 zinglei ah SAC ralkap 50 hrawng nih an khangh i inn 30 leng a ciam dih, tiah tualchung mi nih an chim.Nihin January 30 chunhlan tiang mei an phalh lio a si i inn a kang mi zat fiang in theih khawh a si rih lo, tiah tualchung mi nih an chim.
SAC ralkap pawl cu Tharsi khua lei in a ra mi an si i inn 200 hrawng a umnak Htanpinhla khua an luh hnu ah kaphnih kar kahdohnak um lo in timh ciammam tein inn an khangh colh, tiah tualchung mi pakhat nih RFA ah a chim.
“Nihin January 30, zinglei suimilam 4:00 hrawng ah SAC ralkap pawl cu an phan i suimilam cheu tluk an um hnu ah inn khangh an i thawk colh, tualchung mi belte cu SAC ralkap pawl an phanh hlan ah an zaam dih manh hna. SAC ralkap pawl nih Htanpinhla khua an khangh i thilri an laak hnu ah Tharsi khua ah an kir ṭhan”, tiah tualchung mi pakhat nih cun a chim.
A luancia January 2 ni ah Htanpinhla khua cu SAC ralkap pawl nih an khangh i inn 3 a ciam tiah tualchung mi nih an chim nain, cucu a dik lo mi thawngpang vaivuan sawh a si, SAC ralkap pawl Htanpinhla khua ah an kal lo, tiah SAC Ministry of Information nih January 3 ah an thanh ve.
Myanmar ram chung inn a kaang mi cazin a khawmtu phu Data for Myanmar nih a liamcia 2023 December 31 tiang a langhter ning ah SAC nih hramhram in nawlngeihnak an laak hnu in Myanmar ram hmunkip ah inn 78,737 an khangh cang.