TNLA Nih Namtu Khuapi An Laak Hnu Ah Honwitzer Hriamngan Telh In Hriamnam Dang Tam Ngai An Laak.Shan ramkulh chaklei, Namtu khuapi chung SAC ralkap sakhan pawl laak a si hnu ah Honwitzer hriamngan telh in hriamnam dang tam ngai an laakmi cu TNLA nih phozar in an langhter. Nihin December 28, zing suimilam 1:30 hrawng ah Namtu khuapi chung SAC ralkap Khah-Mah-Yah 324 Byuha sakhan telh in ralkap sakhan 4, palik sakhan le SAC zung vialte cu TNLA an laak dih, tiah theih a si.
A luancia December 25 ni thawk in Namtu khuapi chung ralkap sakhan cu Ta’ang ralkap PSLF/TNLA nih an kah i ni 4 tluk a rauh hnu ah Namtu khuapi cu a ningpi in an laak i an uk khawh cang. 1027 Operation thawk ni in nihin December 28 tiang ah Ta’ang ralkap PSLF/TNLA nih Namhsan khuapi, Namhkam khuapi, Manton khuapi, Monglon khuapi le Namtu khuapi hna an laak i a ningpi in TNLA nih kan uk khawh cang, tiah an thanh. TCP