Pyidawthar Khuami Nu Pakhat Bomb Lamh Sualnak In Nunnak Liam- Kalaymyo chaklei Pyidawthar khuami nu pakhat cu nihin May 3 zaanlei sang ah khuachung a va luh nak ah bomb aa lamh sual i a nunnak a liam tiah kan theih. A nunnak a liam mi hi Pi Mang Nu kum 30 a si i a orhlei ke aa tan i a thi chuah a luan caah a nunnak a liam hi a si i fa 4 a ngei mi a si.A tu ah Pyidawthar khuachung ah SAC le dothlennak ralkap karlak ah kahdohnak pehtlai in a chuak cuahmah tiah theih a si. CBN
Chinram, Thantlang Peng Khua Cheukhat Ah Thlichia Le Rial Ruang Ah Inn A Rawk Mi A Tam– Chinram, Thantlang peng khuate cheukhat hna ah thlichia a hrang i rial a tlak ruang ah inn a rawk mi a tam, tiah theih a si. Nizan May 2 zanlei in thlichia hran hram aa thawk i zankhuadei ti tluk a hran ruang ah Thantlang peng khuate cheukhat umnak inn a rawk mi an tam, a cheu cu thlichia nih inn cungcih a hawh mi le a cheu cu rial tlaknak in a awng dih mi an si kong tualchung mi nih The Chin Post ah an chim.
Nizan May 2 a hrang mi thliachia ruang le rial a tla mi ruang ah Lungler khua ah inn 50 hrawng, Sihhmuh khua ah inn 30 hrawng, Ruakhua 52, Vanzang 23, Hmunlipi 7, Thau 10, Thangzang 85(rial nih inn cungcih pemh) mi le khua dangdang zong ah a rawk mi an um pah, tiah theih a si. Cu bantuk ṭhiamṭhiam in Mizoram ramkulh chung khua cheukhat zong ah inn a rawk mi a tam ngai ve, tiah theih a si.
