Minchinhti Pyusawhti Khua Sakhan Kahnak Ah SAC Ralkap 3 An Thi, Pyusawhti 60 A Nung In Tlaih An Si
— Sagaing ramkulh, Shwebo pengkomh, Minchinhti Pyusawhti khua sakhan kahnak ah SAC ralkap 3 an thi, meithal zunn 6 an lak khawh, pyusawhti chungtel 60 a nung in tlaih an si tiah Shwebo pengkomh No. 18 battalion sin in theih a si.
![](http://teachexclusive.com/wp-content/uploads/2023/12/u-1.png)
December 24 zing 3:00am ah Shwebo pengkomh, Minchinhti khua um battalion 4 le a kuttang um no 6 Pyusawhti khua cu an va kah.SAC rallkap le palek telh in Pyusawhti tangti phu pawl hmunhma 2 le ralkhamnak 1 cu suimilam 2 chung kahnak ah mipi ralkap lei nih an lak khawh. SAC ralkap hmun an laknak Sianginn cu zing 5:00 am ah Shwebo mipi ralkap battalion no. 18 nih an lak khawh hi a si.
Kahdohnak ah Zikung pyusawhti khua in 81 mm voi 8 le RPG- voi 2 kah an bawmh ve hna. SAC lei palek pakhat a thi, Pyusawhti pahnih an thi i, meithal number 9 zuun 5, Carbine meithal zuun 6 an lak khawh. Mah Pyusawhti khua ah SAC ralkap nih khuachung mipi hrocer le tangka halnak an tuah tawn. Pyusawhti hriamtlai ding in ralkap an tuan ter hna tiah Shwebo pengkomh battalion no. 18 nih an chim tiah People’s Spring sin in theih a si.
Kahdohnak ah Pyusawhti phu chung in pa 29 le nu 31 a nung in an tlaih hna. Kahdohnak suimilam 2:30 chung ah Pyu khua hi an lak khawh. Cheukhat pyusawhti pawl cu an tli/zaam kho tiah theih a si. Mah Pyu khua kahnak ah Shwebo pengkomh No. 26 battalion (MDF-Shwebo, Shwebo pengkonh No. 15 battalion, Shwebo pengkonh No. 17 le Shwebo pengkonh No. 18, kuttang No. 1 Caunglehte, No. 2 Wetlet mintakyi, No. 3 Finger three, No. 4 Cialay, No. 5 Daung Minta, No. 6 Wetlet Mitauk le khuachung Bakaphah phu pawl an tangti hna tiah theih a si.
Minchinhti Pyusawhti khua cu SAC nih uknak a lak hnu ah Pyu ralkap pawl thazang a thawnnak khua pakhat asi i mipi ralkap PDF he kahdohnak a chuah tawnnak khua zong a si. Hlan November 25 zing 6:00am ah Shwebo peng um SAC ralkap sakhaan le Pyusawhti thazang 50 umnak Pyu khua a si mi, Ditidaw, Ngaungkaine le Zephyu khua tiah khua 3 cu PDF nih hriamngan, hriamhme, drone in an kah hna.
SAC lei nih Mi 35 Helicopter in suimilam 1 leng voi 2 rat in kah a bawmh hna, sakhaan pakhat kan lak deng nain vanlawng kahnak ruang ah hnu an pil ṭhan. Ditidaw khua kahnak ah SAC ralkap le Pyusawhti a thi mi 20 hrawng an si lai, mipi ralkap lei 5 hliam an tuar tiah Bo Kyar Yaine lei nih an chim chap. SAC ralkap sakhaan umnak Ziphyukung khua cu an kal tak caah mah sakhaan cu PDF lei nih mei an rak kangh. TCLP