Hakhathar UPC Biakinn SAC Ralhraang Nih An Thurhhnawmh. Chinram, Hakhathar, Nahau Tlang ah a um mi Peter UPC biakinn ah SAC ralhraang pawl an riak i zu an din hlei ah pastor quarter zong an boh i thil an fir tiah khuami sin in kan theih. Khuami pakhat nih, ”Biakinn chung ah zu an ding, Church Pastor te umnak le Mino Pastor te umnak an boh hlei ah an thilri an firpiak hna. Hika hin hriamtlai nih an kan kahnak hmun a si tiah ralhraang nih an kan ti i Biakinn zong ah thlacam an kan sianh lo,” tiah a chim.
2021 ah ralkap nih nawlngeihnak hramhram in an laak hnu khan Peter UPC biakinn kulh chung cu SAC ralhraang nih an check lengmang hlei ah Peter UPC biakinn hi meithal kuan nih a khennak hmun a tam ngai, ti zong a chim chap. Nahau Tlang ah a um mi khuami tam deuh cu zaan ah an um ngam lo nak a thla in a si cang. Chun tu ah vok le ar rawlpek ah inn an hlam tawn i zarhpini chun ah an i pum tawn ti zong khuami sin in kan theih. THP