Rangoon Ah Sang Pakhat In Mino 20 Nan Chuahpi Lai Tiah SAC Nih Nawl A Pek Hna, Mino Tampi An Tlaihchap Hna, Kum Tlinglo Zong An I Tel- Rangoon ramṭhen Thanlyin peng ah February 12 thawk khan SAC ralkap, palik le uktu hna nih inn khat ah mino pakhat nan chuak hrimhrim lai tiah hramhram in mino tam ngai an tlaih hna i SAC ralkap sakhan ah an chiah hna.
An tlaih mi hna chung ah kum tlinglo zong an i tel tiah theih a si. Mino cheukhat cu an duh lo caah “Nangmah na rat lo ahcun na nu kan kalpi lai” tiah an hrocer hna tiah tlaih a tong mi chungkhar in nu pakhat nih a chim.Cu lawng si loin Rangoon ramṭhen chung i sang/veng pakhat in mino 20 nan chuahpi hna lai tiah sang uktu hna cu SAC nih nawl an pek hna, tiah theih a si.
2024 April Thla Dongh Lai Ah Ralkap Tla Ding Auh An Si Lai – Tiah Zaw Min- Myanmar ram chung ah ralkap tla kho ding nu le pa nuai 14 an um i 2024 April thla dongh lai ah ralkap tla ding auh an si lai, tiah SAC chimnak nawlngeitu Zaw Min Tun nih a chim. Kum 2019 caan karlak ram mi milu rel cazin ningin ralkap a tla kho ding pa nuai 6.3 le nu nuai 7.7, an dihlak nuai 14 an um i a ra lai mi April thla dongh ah ralkap tla dingin auh hram thawk a si lai, tiah a chim chap.
February 13 ah SAC nih ralkap tla ding auhnak central phu an ser i Chairman ah runvennak Minister le Vice Chairman ah ralkapbu vialte uktu an thim hna i chungtel ah Minister 10 le SAC officer 6 an i tel, tiah theih a si. Zaw Min Tun nih, ram mi cu ralkap tla dingin kan auh hna hnu ah training kan pek hna lai i ralhmai ah kalter colh an si lai, tiah phungning tein a thanh. TCP