ULA/AA Nih Paletwa Ah I Ukhruainak Kalpi An Timh Cu A Dik Mi Lam A Si Lo Tiah Chinram Cozah Prime Minister Nih A Chim- Chinram thlanglei, Paletwa peng cu Rakhine ralkap AA nih an uk i, zatlang i ukhruainak kalpi an timh cu a dik mi lam a si lo, tiah Chinram cozah Prime Minister Pu Pa Thang nih a chim. “AA nih Paletwa peng ah zatlang i ukhruainak kalpi an timh cu a dik mi lam a si lo.
![](http://teachexclusive.com/wp-content/uploads/2024/03/Screenshot_11-1.png)
Hi bantuk hi cu caan a rauh tik ah tlangcung mi khat le khat kar ah i hmuhthiam lonak a chuahter khotu a si i an kalpi lo ah a ṭha bik, asinain a hlan ah kan rak chim cang bantukin ramkhel phungning tein tonbiaruahnak he ceihmainak kan ngei hmasa lai,” tiah Pu Pa Thang nih a chim. Paletwa kong he pehtlai in Rakhine ralkap ULA/AA le Chinland Council, Chinram cozah tonbiaruahnak ngei in tuah a herh mi tete tuah timh a si kong zong Chinram cozah Prime Minister nih cun a chim.
Paletwa peng chung ah a um mi mizapi caah humhimnak ca le ṭhanchonak ca ah tiin timhlamhnak ngei in i ukhruainak kalpi an i timhnak kong Rakhine ralkap AA nih a luancia March 4 ah tuah mi Press Conference ah an rak chim. “Paletwa peng cu humhimnak ṭhate laakpiak ding le a peng chung ah daihnak a um khawh nakhnga pehzulh in ULA/ AA uknak tang ah umter a si ko lai,” tiah March 4 ah tuah mi Press Conference ah ULA/ AA chimnak nawlngei U Khine Thukha nih a chim.
“Paletwa hmunram pakhat lawng lungre i theihpi lo in Chinram a luat khawh nakding tu ah i zuam cio ding in forhfial kan duh hna,” tiah U Khine Thukha nih cun a chim. Rakhine ralkap AA nih 1027 Operation an kalpi hnu ah Chinram, Paletwa peng chung SAC Byuha sakhan cu pakhat hnu pakhat in an laak i, sakhan dihlak an laak hnu ah January 14 ni thawk in Paletwa cu a ningpi in an rak laak.TCP