Hakha Peng Buanlung Khua Ah Puahkehnak A Chuak I Ngakchia Pahnih Nunnak Liam, A Dang 4 Hliam An Tuar- Chinram, Hakha peng, Buanlung khua ah CDF-Senthang motor cung ah ngakchiat pawl an kai i a cung an um lio ah motor chung in puahkehnak a chuak i ngakchia pahnih an nunnak a liam i a dang ngakchia 4 hliam an tuar, tiah theih a si.
CDF-Senthang motor pakhat cu nizan March 10, zanlei suimilam 4:00 hrawng ah Buanlung khua a phan i Buanlung khua ngakchia pahnih motor cung an um lio ah puahkehnak a chuak, tiah tualchung mi pakhat nih cun a chim. “CDF-Senthang ralkap pawl cu rianherh ah nizan March 10 ah Buanlung khua an phan i an ṭum hnu ah ngakchia pawl cu motor cung ah an kai i a chung an um lio ah puahkehnak a chuak, a hmun ah ngakchia pakhat a thi colh i a dang pakhat cu siizung an kalpi lio lampi ah a thi,” tiah tualchung mi pakhat nih cun a chim.
CDF-Senthang motor chung in puahkehnak chuah ruang ah a nunnak a liam mi cu Biak Tin Peng le Van Biak Cung an si i kum 13 hrawng an si, tiah tualchung mi nih an chim. A liamcia 2022 October 19 ni zong ah SAC ralkap nih Buanlung khua ah hriamngan an rak kah ruang ah kum 6 hrawng a si mi Henry Bawi Za Lian le James Siang Za Uk cu an nunak a rak liam, tiah theih a si.