Nihin ah KTM nih alanghter ning ahcun SAC ralkap lut dingmi min cazin latu dingah tuanvo khinhmi hna cu pumpak in runvennak an tuahpiak hna lawng si loin an chungkhar tiang in runvennak lak piak dingin thawngthanhnak an tuah a ti. Min cazin latu hna hi khuapi chung a si ahcun zatkuat/area chungah inn 100 uktu, inn 10 uktu tibantuk in tuanvo nawlngeihnak pek an si i khuate a si ahcun khuabawi le a bawmtu an si lai. Cubantuk riankhinhmi hna le chungkhar hna cu runvennak tha tein tuahpiak an si lai ti a si.
SAC ralhrang nih 29 March ah Yangon myodagun 49 area ah unau tlangval mino pahnih an tlaihmi hna sinin thawngtheih ning ahcun, SAC ralhrang nih raltuknak training peklo in a tu hi raltuknak hmun Shan pyine kan phan cang tiah chungkhar an chawnh hna. Ralkap lut dingin heh tiah minung an tlaih hna, an kawl cuahmahmi hna zong hi an chim bantuk a si lai lo, training tuah lemloin ralram ah kuat thluahmah dawh an si cang.