Hakha Khuapi Ah Passport Aa Tuah Mi An Karh, Ni 6 Chung Ah Minung 1,000 Deng An Phan. SAC nih ralkap tlaknak upadi an ser hnu in Chinram khualipi Hakha ah passport aa tuah mi an karh, tiah theih a si.
SAC nih upadi an chuah hnu in Hakha khuapi ah passport aa tuah mi hi ni 6 chung ah minung 1,000 deng an phan. Ni khat ah minung 100 leng nih an tuah, tiah passport zung he naihniam in a um mi nih Ayeyarwaddy Times ah a chim.
“SAC nih ralkap tlaknak upadi an ser hlan ah cun passport an tuah mi an um ti lo tluk a si. Passport zung ah a kal mi zong an rak um lo nain upadi an ser hnu ah passport aa tuah mi an tam. Zingka tein passport zung hmai ah minung an khat cang,” tiah tualchung mi pakhat nih The Chin Post ah a chim.
Chinram Paletwa peng dah ti lo a dang khuapi cu SAC kuttang ah a um rih i ralkap tlaknak upadi an ser hnu ah mino tampi le nule pa cu thinphang ngai in an um, tiah theih a si. SAC nih ram mi ralkap tlakternak upadi an ser hnu ah CNF nih mino tampi cu dohthlennak ah i tel ding in forhfialnak an tuah.