Mindat-Matupi Lampi Ah Rallam A Sial Mi SAC Ralkap Pawl CDF-Matupi Nih Bomb An Puahhnawh Hna-Chinram, Mindat-Matupi lampi lei ah Matupi khuapi hrambunh Khah-Lah-Yah 304 in SAC ralkap 100 hrawng rallam a sial mi cu CDF-Matupi nih bomb an puahhnawh hna i minung 6 hliam an pu, Chianpian (B) khua cu a ningpi ti tluk in an khangh, tiah CDF-Matupi nih nizan February 2 ah an thanh.
Khah-Lah-Yah 304 in SAC ralkap 200 hrawng cu February 1 ni ah Mindat-Matupi lampi cung Chianpian (B) khua lei ah rallam an sial i CDF-Matupi nih bomb an puah hna hnu, nizan February 2, zinglei suimilam 8:00 hrawng ah an thinhun lung in Chianpian (B) khua cu an khangh, tiah theih hna.
SAC ralkap 200 chung in a zatceo hrawng cu Matupi khuapi lei ah an kir cang nain minung 100 hrawng an taan rih caah CDF-Matupi he zeitik caan paoh ah aa kap kho mi an si bantukin tualchung mi zong nih Matupi-Mindat lampi hmang rih lo ding in le ram ah kal rih lo ding in CDF-Matupi nih tualchung mi cu ralrin an pek hna.
Matupi khuapi hrambunh Khah-Lah-Yah 304 Battalion cu a liamcia 2023 December thla chung ah Thebuai sakhan a chuahtak mi SAC ralkap nih thazaang an chapnak Battalion a si pin ah tukum 2024 January thla chung ah Sami khuapi no.2 Byuha sakhan a chuahtak mi SAC ralkap nih thazaang an chapnak Battalion a si.
Uknak Laak Kum Thum Tlin Ni Dawr Hon Lo Ruangah Mandalay Khuapi Um Dawr Khan 90 Kharter An Si- SAC nih nawlngeihnak an laak kum thum tlin camtuak ah dawr a hong lo mi Mandalay khuapi, Maha Aungmyay peng um dawr 90 cu SAC nih thla ruk chung an kharter hna leng ah dawr khan pakhat ah kyats sing 7 liam ding in an ti hna, tiah SAC he naihniam in a um mi hna sin in theih a si.SAC kuttang Telegram Channel ah dawr khan 90 aa khar mi video cu an langhter i SAC uk duhlonak a langhtertu an si ca ah dantat dingin ti an si.
Maha Aungmyay peng dawr khan 1,000 deng a umnak hmun i dawr ngeitu tam deuh nih cun nawlngeihnak laak kum thum tlin ni February 1, 2024 ah dawr an hon lo caah SAC le sipin i bawm in chun lailing ah an luhhnawh hna i hramhram dawr in an honter hna, tiah theih a si.February 2 zinglei ah SAC ralkap pawl cu motor pahnih in khuachung dawr khan lei ah an lut ṭhan i dawr hong ding in an auhnawh hna, tiah tualchung mi hna sin in theih a si.