Konkyan Khuapi Hrambunh 125th Infantry Battalion Cu An Battalion Ningpi In Thandar Raang Thlir In Hriamnam He Mipi Sin Ah An Lut- Chaklei Shan ramkulh, Laukkai Regional Operations Commands (ROC) Da-Kah-Sah kuttang Konkyan khuapi hrambunh 125th Infantry Battalion cu an Battalion ningpi in thandar a raang thlir in an hriamnam he November 28 ah mipi sin ah an rak i fonh tiah MNDAA chimnak nawlngei Ly Kyarwen nih Khit Thit Media ah a chim.
![](http://teachexclusive.com/wp-content/uploads/2023/11/ty.png)
Operations 1027 an tuah ni 33 a tlinnak November 28 ah Kokang peng Konkyan hrambunh SAC ralkap pawl cu thandar raang thlir in a sung an pek caah Konkyan hmunram cu kan lak khawh cang tiah MNDAA lei nih an chim. Atu bantuk in Battalion ningpi in hriamnam an chiah hi a voi hnihnak a si i, a luancia November 12 ni ah Laukkai Regional Operations Commands (ROC) Da-Kah-Sah kuttang 129th Infantry Battalion in ralbawi 2 le ralkap 126, an chungkhar minung 134, an zate minung 262 cu mipi sin ah an rak i fonh bal cang.
Hriamnam he mipi sin ah aa fonh mi SAC ralkap pawl cu mipi ralkap phu nih minung pakhat ah tangka sing 10 MMK cio an pek hna hlei ah an chungkhar minung pakhat ah sing 1 MMK cio an pek ve hna. Man lak lo in an ngandamnak thlopbul piak an si i ṭuanvo an lakpiak hna. Cu pin ah umkal an duhnak hmun cio ah humhimnak an lakpiak hna tiah theih a si. TCP