Rezua ralhrang sakhan laknak ah nunnak a liammi pasaltha 3 an si. Miphun caah nunnak a pemi hna hi CNA pasaltha salai David, CDF-Mara in Salai Bawi Za Mang ,CDF-Zotung in Salai San Law Tha ,CDF-Lautu in Salai David Thang (Le Le) hna an si. Rezua ralhrang tampi cu miphun ralkap kutah Surrender an tuah tiah theih a si.
Rezua Khuapi Cu Chin Ralkap Ṭangṭi Phu Nih An Laak. Chin ramkulh, Matupi peng, Rezua khuapi cu CNA hruaimi Chin ralkap ṭangṭi phu nih nihin November 29, zing ah an laak. Rezua khuapi SAC ralkap sakhan cu November 26 in CNA, CDF-Zotung, CDF-Zophei, CDF-Mara, CDF-Zophei, CDF-Lautu, CDF-Senthang, CDF- Thantlang le CDF-Hualngoram nih an kah i nihin November 29, zinglei suimilam 10:00 hrawng ah an laak khawh, tiah theih a si.
“ZZLMS Operation min bunh in Chin ramkulh, Zotung hnunram, Rezua khuapi kahdohnak cu a luancia November 26 in kan rak thawk i nihin November 29, zinglei suimilam 10:00 hrawng ah kan laak khawh,” tiah CDF-Zotung in ṭuanvo ngei pakhat nih The Chin Post ah a chim. “Rezua khuapi cu a ning pi in Chin ralkap phu kut ah a um cang. Hriamnam zeimawzat zong kan laak khawh nain a zat belte hngalh a si rih lo.
Cun, kahdohnak kong he pehtlai in ralkap lei in thi le hliam zat hngalh thlu a si rih lo caah thawngfiang he tling deuh in thanh khawh ṭhan kan i zuam lai,” tiah CDF-Zotung in ṭuanvo ngei pakhat nih cun a chim. Rezua khuachung kahdohnak ah cun CDF-Zotung ralkap pakhat le CDF-Mara ralkap pakhat nih ram le miphun ca ah an nunnak an pek tiah, tiah a chim chap. CNA hruainak in Chin ramkulh chung khuapi cheukhat Surkhua, Hnaring, Makui Innu, Weibula, Rihkhawdar, Lailenpi le Rezua khuapi hna cu Chin ralkap ṭangṭi phu nih an laak khawh cang. TCP