SAC Ralkap Vanlawng Bomb Thlak Ruang Ah Mindat Peng Tualchung Mi 5 Hliamtuar- Chinram thlanglei, Mindat peng, Station 13 hmunram Aukchaing khua ah nizan April 2 ah SAC ralkap nih vanlawng in bomb an thlak ruang ah tualchung mi 5 hliam an tuar i, sianginn telh in umnak inn cheukhat an rawk, tiah tualchung mi nih an chim.
Nizan April 2, chunhnu suimilam 2:00 ah SAC ralkap nih vanlawng pathum in pound 500 tluk a rit mi bomb telh in bomb lung 10 an thlak ruang ah Aukchaing khua sianginn le umnak inn cheukhat an rawk, kaangmei zong a chuak i minung 5 hliam an tuar, tiah tualchung mi nih cun an chim.Aukchaing khua pawngkam ram hna ah SAC ralkap nih vanlawng in mei bomb an thlak i kaangmei a chuah pin ah zanlei suimilam 5:00 hrawng ah Mindat peng Station 14 le Matupi peng ramri ah bomb an thlak, tiah tualchung mi nih an chim.
April 1 ni zong ah Mindat peng Station 1 khua ah SAC ralkap nih vanlawng in voi hra hrawng bomb an thlak ruang ah Khrihfa Biakinn telh in umnak inn cheukhat an rawk.RFA nih an khawmh mi cazin ning ah SAC ralkap nih hramhram in nawlngeihnak an laak hnu in Chinram ah SAC ralkap vanlawng kahdohnak ruang ah tualchung mi 60 leng nunnak a liam cang.
KNU Brigade 5 Hmunram March Thla Chung I Kahdohnak Ah Captain Pahnih Telh In SAC Ralkap 42 An Thi – Karen ramkulh, Hpapun pengkomh, KNU Brigade 5 hmunram March thla chung ah kahdohnak voi 99 a chuak i Captain pahnih telh in SAC ralkap 42 an thih kong KNU Brigade 5 nih phungning tein an thanh. A luancia March 1-31 tiang ah KNU Brigade 5 hmunram chung ah KNLA Brigade 5 tang ralkap le SAC ralkap kar kahdohnak voi 99 a chuak mi ah SAC ralkap 42 an thi i minung 55 hliam an pu, tiah theih a si.
KNU Brigade 5 hmunram chung kahdohnak a thi mi SAC ralkap lak ah Captain pahnih, Second Lieutenant pakhat, Sergeant pahnih le Lance Corporal pahnih an i tel, KNLA lei in minung 8 nih ram le miphun ca ah nunnak an pek i minung 14 hliam an tuar, tiah theih a si.
Kaphnih kar i kahdohnak ah cun SAC ralkap nih tualchung mi an umnak inn le leikuang hna ah hriamngan voi 42 an kah pin ah Drone le vanlawng in bomb lung 1,485 an thlak ruang ah naupawi lio nu pakhat telh in tualchung mi 8 nunnak a liam i minung 30 hliam an tuar, minung 1,624 cu a himnak hmun kawl in ral an zaam, tiah theih a si.