Mah thawngpang hi a dikmi a si ko ahcun mipi ralkap caah fak piin thlacamnak in bawm hna u sih. Atu hi ralhrang thazaang 60 hrawng cu Taingen Sakhan lak than ding ah an rak kai tiah thawng theih a si. Cu thawngpang ruangah a tu hi CDM-Siyin le PDF Zoland cu tha tein hmunhma an lak cang.
TCP- SAC Ralkap 278 Cu India Ram Chung Ah An Zaam Ṭhan. Chinram, Paletwa hmunram chung kahdohnak in a zaam mi an si lai, tiah ruah mi SAC ralkap 278 cu nihin January 17 ah India ram, Mizoram ah an zaam, tiah theih a si. Mizoram, Parva khua khatlei ral Myanmar ram chung Karva tiva ah SAC ralkap le tualchung hriamtlai phu kar kahdohnak a chuah hnu ah ralkap 278 cu nihin zanlei suimilam 4:00 hrawng ah Lawngtlai pengkomh Bandukbanga khua ah hriamnam he an lut i Assam Rifile nih an buaipi hna.
A liamcia 2023 December 29 ni ah India-Myanmar ramri SAC ralkap point 377 sakhan cu Arakan Army nih an rak laak i, cu sakhan cun ralkap 151 cu Mizoram ah an rak zaam. Point 377 sakhan in Mizoram chung ah a lut mi SAC ralkap 151 cu January 2 ni ah India cozah nih Myanmar ram ah an rak kuat ṭhan hna. Cun, a luancia January 9 ah Shinletwa sakhan in Mizoram chung ah a zaam mi SAC ralkap 104 zong India cozah nih Myanmar ram ah a rak kuat hna. Nihin January 17 ah Mizoram, Lawngtlai pengkomh Bandukbanga khua ah a lut mi SAC ralkap 278 cu khoika sakhan in dah an zaam ti theih a si rih lo i Paletwa hmunram in a zaam mi an si lai, tiah zumh a si.