SAC Chiarman Min Aung Hlaing Le Ramkhel Party 39 Cu Naypyidaw ah Tonnak An Ngei. SAC Chairman General Min Aung Hlaing le SAC Union Election Commision tang ah registration a tuah mi ramkhel Party 39 hruaitu pawl cu nizan January 6 ah Naypyidaw ah tonbiaruahnak an ngei i SAC Chairman nih thimnak (Election) cu kan tuah hrimhrim awk a si, tiah a chimh hna. Cu tonbiaruahnak ah cun 2008 phunghrampi he aa tlak in a zalongmi thimnak kan tuah ṭhan lai i teinak a hmumi Party sin ah Democracy phunglam he aa tlak ning in rampi rian cu pek an si lai, tiah General Min Aung Hlaing nih a chim.
Cu pin ah a hlan cozah chan ah a dik lo mi le limhang a ngei lomi thimnak rak kalpi a si cang ruang ah kannih nih cun a dikmi le limhang a ngeimi thimnak kan kalpi awk a si i, thimnak cu kan tuah hrimhrim awk a si, tiah SAC Chairman nih cun a chim. Thimnak (Election) ca ah a hlankan in timhlamhnak zong ngeih a si ko nain hriamtlai phu hna nih hnahnawhnak a kan pek lengmang, tiah a chim chap. Hramhram in nawlngeihnak laak a si hnu in SAC Chairman Min Aung Hlaing nih thimnak kong he pehtlai in atu le atu a chim nain a ni le a caan belte a chim chih bal lo. Phunglam ning in SAC nih ramkhel Party 45 cu registration tuah an onh hna i, cu chung ah register a tuah mi Party 39 le SAC Chairman cu January 6 ah, a voi khatnak tonbiaruahnak an ngei.
SAC Ralkap Nih Bomb Thlak Ruangah Kanan Khua Nunnak A Liammi Minung 17 An Phan. Tamu peng, Khampat khuapi pawng Kanan khua ah SAC ralkap nih Fighter in nizan January 7 zing suimilam 10:30 tluk ah bomb lung 4 a thlak i ngakchia telh in minung 17 an nunnak a liam. SAC ralkap Fighter nih hin Kanan khua cacawnnak sianginn pawng le St. Peter Baptist Church pawng ah bomb a thlak. Khua mi hna cu Biakinn ah Pathian thangṭhatnak an tuah lio a si caah hliamhma pumi zong an tam, tiah theih a si.
SAC ralkap Fighter nih bomb a thlak lio ah hin sianginn hmai pumpululh certual ah pumpululh a chuih mi ngakchia zeimawzat an um i, kutke a bul mi le hliam tuar mi minung 30 tluk an phan. A thi mi minung 17 ruak cu January 7 zanlei ah an vui colh hna, tiah tualchung mi hna sinin theih a si. Kanan khua pawng Khamtpat khuapi cu tualchung hriamtlai phu nih an laak mi a si i Kalay-Tamu lampi, India ramri ah a ummi khuapi a si. TCP