SAC Ralkap Hriamngan Kahnak In Letpanchaung Khuami Kum 9 Tluk Pa Ngakchia A Thi. Sagaing ramṭhen, Kalaymyo chaklei Letpanchaung khua ah nihin zinglei ah SAC ralkap nih hriamngan an kah ruang ah tualchung mi kum 9 tluk pa ngakchia a thi, tiah theih a si. Nihin January 3, zinglei suimilam 9:00 hrawng ah Letpanchaung khuachung ah SAC ralkap nih an kahmi hriamngan kuan pahnih a puah ruang ah tualchung mi 7 an i hliam, kum 9 tluk a simi Joseph Malsawmhlua cu a hliamhma a fah ngai ruang ah chun suimilam 12:30 hrawng ah a nunnak a liam, tiah theih a si.
Joseph Malsawmhlua cu a unau pawl he hringtu a pa vok inn sak an bawmh lioah an pawngkam ah hriamngan a tlak ruang ah hliamhma fak ngai a put hnu ah a nunnak a liam i midang hliampu mi hna zong Kalaymyo siizungpi ah an thlopbul hna lio a si, tiah theih a si. Kalaymyo he meng 10 hrawng a hlatmi Letpanchaung khua cu Chinmi tam ngai khua an saknak khua a si i a hlan zong ah SAC ralkap hriamngan kahnak in tualchung mi thi le hliam an um pah lengmang tawn. TCP