MINUNG NIH BIBLE AH A UM LOMI THIL A UMMI AH KAN RUAHMI PHUN (5)
5. VANMI THLA KAN HNGEIH TER HNA- Pathian nih Moses cu Moses a ti, Moses kha “Abraham” a ti bal lo. Angel (vanmi) cu angel (vanmi) a ti ve hna. Seraph cu serath a ti hna i cherub cu cheruh a ti hna. Seraph le cherub (thla a ngeimi hna) cu Pathian nih Bible pumpi ah angel (vanmi) a ti bal hna lo (Chanthar minung nih kan ti hna). Seraph le cheruh cu angel (vanmi) asi lomi, Vancung ah a ummi thil nung dang an si.
Baibal pumpi ah vanmi thla an ngei timi cacang a um lo. Abraham, Lot, Sodom khua mi, Jacob mang, tukhal hna, le thawhțhan ni ah vanmi an i langh ah thla an ngei lo. Vanmi cu thla an ngeih lo caah minung he palh sual khawh an si (Heb. 13: 2). An mui a ceu i an thilthuam a ran tuk caah vanmi an si an theih khawhnak hna lawng Bible ah kan hmuh.
4. MITHLA KAN UM TER RIH Minung nih thlarau pakhat lawng kan ngeih. Pahnih kan ngei lo. Kan takpum a thih ah, cu kan thlarau cu vancung ah a kai lo le hell ah a kal. Hihi Khirhfa zumhnak dik Jesuh cawnpiak ning cu asi (MIrun pa le Lazaruh kha zoh hna). Minung hi kan thih hnu ah kan thlarau vancung zongah a kai lo, hell zong ah a kal lo, mithla sinak he a vaak timi zumhnak nakin a tlau deuhmi minung an um lo.
Zultu hna nihhin mithla hi an rak zumh ve caah Jesuh kha mithla ah an rak rel. Cucu Jesuh nih mithla ah maw nan ka rel a timi kha asi. Jesuh nih mithla a um a tinak asi lo. Zultu hna zumhning, pom ning le hmuh ning kha a chimmi asi. Cucaah, Jesuh nih nan zumhnak a der tuk a ti lengmang hna. Hika i Jesuh chimmi hna mithla a um timi na zumhnak an bawmchantu ca i nai chirhchanh ahcun na reverend title le na evangelist sinak kha va ap țhan hna law na caah a țha deuh lai.
3. PATHIAN SAKMI MIN (GIVEN NAME) KAN NGEIH TER FAWN- Adam timi cu mipa tinak asi. Pa poh hi Hebrew holh cun Adam kan si dih. Adam nih mipa asinak pin in min dang a ngei lo. Mipa timi cu a pumpak min si loin asinak (title) min asi. Mipa pakhat lawng asi rih caah sakmi min a herh lo. Fapa a von ngeih hna hnu lawng ah mipa cu an von tam caah minsaknak hram ai thok.
Pathian cu pakhat lawng asi. Minsak a herh lo. Asinak min “Bawipa” or “Pathian” tiin auh asi. “Adonai,” “YHWH,” “Jehovah,” timi vialte hi “Bawipa” tinak an si, Pathian caah sakmi min an si lo. “Elohim” ti zonghi “Pathian” tinak asi. Pathian kha an sakmi min asi lo. “Jehovah” timi, “Bawipa” timi hna Pathian asinak min (title name) ah chia lo in Pathian nih pumpak in a ngeihmi min (given name) ah kan ruah sual ahcun ka palh ngai lai.
2. HOLHTHEIHLO KAN SER LE KAN UM TER RIH- Greek Bible pumpi ah “holhtheihlo” timi biafang a um lo. Zei Bible poh Biakam Thar cu Greek Bible in a rami an si dih. Thing Thlarau thilpek lakah ai telmi asi lo. Mirang King James nih ai leh palh caah “holhtheihlo” (unknown tongues) ti in voi (6) an um ter. King James cu anmah King James committee nih a dik lo tuk an ti caah an remh i cucu “New King James” tiah an ti (King James cu a țha komi va si selaw, New King James cu nihlawh leng in an tuah hnga lo).
New King James ah cun “holhtheihlo” (unknown tongues) timi vialte kha anmah King James committee lila nih an hloh dih cang. Kan Lai Bible Thiang ah “holhtheihlo” timi hi voi 27 a um. Zei bantuk biafang hna khi dah “holhtheihlo” a ti duahmah hna hnga i hi vialte hi Lai Bible Thiang ah an um khawh ning asi hnga timi hi thi deng in ruah phu asi. Bible phun dang ngai ah ai cang. Hehehehe!
1. CHAN THAR PROPHET KAN UM TER CHAP RIH HNA- Pathian nih Khrihfabu caah a zaa ti in iphuannak a tuah cang. Khrihfabu caah a herh a timi vialte Bible ah a khumh ter dih cang hna. Aho hmang in? Prophet hna le lamkaltu hna hmang in. “Biatak cawnpiaknak, dingtein kalnak, ichimhhrinnak caauh hmang uh a kan ti (2 Tim. 3: 16). Cu Pathian nih tlingtein ai phuan cangnak Bible cu zumh ding, chimphuan ding ah le zulh ding ah Pathian nih a zaa tiin a kan tuah piakmi asi. Minung tuahmi asi lo.
Pathian nih aw na theihmi kha va chimrel law mi va cawnpiak hna a kan ti lo. Asinain, Pathian nih kan caah a zaa a timi hi a zaa ah kan chia lo. Pathian nakin kan i fel ter deuh. Aw phunphun theih chap kan duh. Khuachia aw dah ti lo theih ding a um ti lo. Aw nan theihmi hi a tlingmi zong an um lai nain, atlingmi percentage in a tlawm tuk. Pathian bia cu 100 percent in a tling tawn. Cheuhra-cheukhat pek a um ko rih mi tu kha a um ti lo, a dong cang nan ti. Kan zumhnak hicu ngaihchia ngai asi. AMT