Hakha Thar View Point 2 Pawng Ah Tualchungmi Pakhat Nih Bomb Aa Lamh. Chinram khualipi Hakha ah tualchungmi pakhat nih vawlei tang phummi bomb lamhsual i hliamhma faak ngai a tuar. Bomb hi SAC ralkap nih an hmanhmi a si lai tiah tualchungmi nih an zumh. January 6 zanlei suimilam 2:00 hrawngah Hakha thar sang um View Point 2 ah, kum 19 tluk tlangval pakhat nih vawlei tang hmanhmi bomb cu aa lamhsual i, a ke faak ngai in aa hliam i, a ke khatlei tan a haumi dirhmun a si, tiah tualchung mi pakhat nih The Chin Post ah a chim.
![](http://teachexclusive.com/wp-content/uploads/2024/01/Screenshot_6-1.png)
Bomb aa lamhsualnak hi Hakha thar lungphun tlang sang ah a ummi View Point 2 pawng, ti inn saknak pawng ah a si i, January 6 zanlei suimilam 2:00 hrawngah a si, tiah tualchung mi pakhat nih cun a chim.
Cuka bomb aa lamhsualnak hmun cu SAC ralkap nih umhmun an khuarnak he aa naihnak hmun a si i, SAC nih nawlngeihnak an laak hnu in cuka pawngkam hrawng ah cun bomb an hmanh, tiah a dang tualchung mi pakhat nih The Chin Post ah a chim.
Rohingya Ralzaam Camp Mei Kangh Ruangah Minung 7,000 Leng Umnak Ngei Loin An Um. Bangladesh ram khuapi Cox’s Bazaar ah Rohingya ralzaam pawl umnak camp cu nizan January 7 zinglei ah a kaang i inn 850 tluk a ciam, tiah media nih an langhter.Zanṭim suimilam 1:00 hrawngah No. 5 ralzaam camp cu a kaang i deilei suimilam 4:00 luan ah mei an phalh khawh. Ralzaam umnak inn 850 leng a ciam i minung 7,000 leng innlo ngei loin an um, tiah UNHCR nih an langhter.
Cacawnnak sianginn, sii khan le zunput telh in ralzaam hna ca ah sakpiakmi inn 120 leng pinah solar tampi zong an kaang. Meikangh ruangah minung nunnak a liammi an um le um lo theih a si lo.
Myanmar ram in Bangladesh ram ah a zaammi Rohingya tam pi cu Bangladesh ram Cox’s Bazaar ah an um hna i vawleicung ah ralzaam tam bik an umnak hmun a si. Hi ralzaam camp hi thlam bantuk in sakmi an si i naihniam tein an um hna caah atu le atu inn kanghnak a chuak tawn, tiah an chim. TCP